ఇక్కడ నిండి.. ఏపీకి తరలింపు

అలంపూర్‌, న్యూస్‌టుడే: అలంపూర్‌ నియోజకవర్గంలోని శీతల గిడ్డంగులు నిండుకోవడంతో ఏపీ సమీపంలోని కర్నూలు పట్టణం గిడ్డంగులకు మిర్చి బస్తాలను ఇక్కడి రైతులు తరలిస్తున్నారు. ప్రస్తుతం ఎండు మిర్చికి మద్దతు ధర లేకపోవడంతో ఉండవల్లి, మానవపాడు మండల పరిధిలోని నాలుగు శీతల గిడ్డంగులు పూర్తి స్థాయిలో నిండిపోయాయి. ఇక్కడ ఖాళీ స్థలాలు లేకపోవడంతో రైతులు ఏపీకి తరలించుకోవల్సిన పరిస్థితి ఏర్పడింది. రైతులు ఎకరాకు రూ.లక్ష వరకు పెట్టుబడి పెట్టారు. దిగుబడి సైతం చాలా మేరకు తగ్గిపోయింది. ఎకరాకు పది క్వింటాళ్లకు పైగా దిగుబడి రావాల్సి ఉండగా, వర్షాలు లేకపోవడం, వైరస్‌ రావడంతో దిగుబడి తగ్గింది. ఆ వచ్చిన పంటకు సైతం మద్దతుధర లేకపోవడంతో రైతులు తీవ్ర ఇబ్బందులు పడుతున్నారు. జిల్లాలో ఈ ఏడాది 60 వేల ఎకరాలకుపైగా మిరపను సాగు చేశారు. శీతల గిడ్డంగుల్లో క్వింటా ఏడాది నిల్వకు రూ.150 వరకు చెల్లించాల్సిన పరిస్థితి రైతులది. గతేడాది క్వింటా రూ.16 వేల నుంచి రూ.18 వేల వరకు పలుకగా నేడది రూ.12 వేల నుంచి రూ.13 వేల వరకు ఉండటంతో రైతుల పరిస్థితి అగమ్యగోచరంగా ఉంది.