అరాచకాల్లో దిట్ట జగన్‌: బీద

మాట్లాడుతున్న తెదేపా జాతీయ ప్రధాన కార్యదర్శి బీద రవిచంద్ర

నెల్లూరు(స్టోన్‌హౌస్‌పేట), న్యూస్‌టుడే: హత్యలు, దాడులు, కబ్జాలు, అరాచకాల్లో దిట్ట జగన్‌ అని తెదేపా జాతీయ ప్రధాన కార్యదర్శి బీద రవిచంద్ర విమర్శించారు. నెల్లూరు తెదేపా కార్యాలయంలో బుధవారం జరిగిన సమావేశంలో ఆయన మాట్లాడారు. అయిదేళ్లు ముఖ్యమంత్రిగా జగన్‌ ప్రజలను మోసం చేసి.. ఇప్పుడు మీరే నన్ను కాపాడాలని కోరడం విడ్డూరంగా ఉందన్నారు. స్వాతంత్య్రం అనంతరం ఎస్సీ, ఎస్టీ, బీసీ మైనారిటీలపై ఏ రాష్ట్రంలో జరగనన్ని దాడులు వైకాపా ప్రభుత్వ పాలనలో ఏపీలో జరిగాయన్నారు. చినాన్న వివేకాను హత్య చేస్తే విచారణ జరపలేకపోయిన అసమర్థుడు జగన్‌ అని అన్నారు. వైఎస్‌ వివేకాను చంపింది ఎవరో.. ఎందుకు చంపారో వివరంగా జగన్‌ చెల్లెలు చెబుతుంటే.. జగన్‌ వర్గం తమకు సంబంధం లేదని   బుకాయిస్తోందన్నారు. జగన్‌కు, వైకాపా నేతలకు వత్తాసు పలికే ఐపీఎస్‌ అధికారి కాంతి రాణ టాటాపై ఆగ్రహం వ్యక్తం చేశారు.