5న దక్షిణ అండమాన్‌లో అల్పపీడనం

ఒడిశాపై ప్రభావం ఉండకపోవచ్చు: ఐఎండీ

గురువారం ఉదయం 7.30 గంటలకు జి.ఉదయగిరి ఫుల్బాణి రోడ్డులో దృశ్యం

గోపాలపూర్‌, న్యూస్‌టుడే: బంగాళాఖాతంలో దక్షిణ అండమాన్‌ తీరంలో 4వ తేదీన తుపాను ఆవర్తనం ఏర్పడుతుందని, 5న ఇది అల్పపీడనంగా మారుతుందని గోపాలపూర్‌ వాతావరణ అధ్యయన కేంద్రం (ఐఎండీ) అధికారి ఉమాశంకర్‌ దాస్‌ గురువారం ‘న్యూస్‌టుడే’కు చెప్పారు. ఈ పీడనం తర్వాత మరింత బలం పుంజుకుని వాయుగుండంగా మారి 8న తమిళనాడు, పుదుచ్చేరిల మధ్య తీరం దాటుతుందన్న అంచనా ఉందన్నారు. ఈ విపత్తు ప్రభావం ఒడిశాపై ఉండకపోవచ్చని, పాక్షిక మబ్బులు ఉండవచ్చునని తెలిపారు. దీంతో ఉత్తర భారతం మీదుగా వీస్తున్న చలిగాలులు తగ్గుతాయని, రాష్ట్రంలో ఉష్ణోగ్రతలు స్వల్పంగా పెరుగుతాయని చెప్పారు. గురువారం కొంధమాల్‌ జిల్లా జి.ఉదయగిరిలో అత్యల్ప ఉష్ణోగ్రత 10.4 డిగ్రీలుగా నమోదైందన్నారు. మిగతా కేంద్రాల్లో ఉష్ణోగ్రతలు 12 నుంచి 20 డిగ్రీలుగా నమోదయ్యాయని తెలిపారు. శుక్రవారం రాయగడ, కొరాపుట్‌, కొంధమాల్‌, కలహండి జిల్లాల్లో మంచు కురుస్తుందన్నారు. ఈ నేపథ్యంలో గురువారం కొంధమాల్‌, బౌద్ధ్‌, కలహండి, నువాపడ జిల్లాల్లో మంచు కురిసినట్లు చెప్పారు.