విధుల నుంచి ఏపీవోను తొలగించకుంటే ఆందోళన

ఒంగోలు నగరం, న్యూస్‌టుడే: విద్యాశాఖ కార్యాలయంలో డిప్యుటేషన్‌పై ఏపీవోగా పనిచేస్తున్న ఎస్జీటీ కేవీ.ప్రసాద్‌ను విధుల నుంచి తొలగించాలని ఏపీటీఎఫ్‌ ప్రతినిధులు కోరారు. ఈ మేరకు కలెక్టర్‌ దినేష్‌ కుమార్‌, డీఈవో విజయభాస్కర్‌లకు మంగళవారం వినతి పత్రం సమర్పించారు. ఈ సందర్భంగా సంఘం నాయకులు డి శ్రీనివాసులు, రఘుబాబు మాట్లాడుతూ.. ఉపాధ్యాయులెవరూ బోధనేతర కార్యక్రమాల్లో పాల్గొనకూడదన్నారు. ఏ ఉద్యోగి అయియినా డిప్యూటేషన్‌పై రెండు సంవత్సరాలకు మించి పనిచేయకూడదని.. అయితే ప్రసాద్‌ మాత్రం 2004 నుంచి బోధనేతర విధుల్లోనే ఉన్నట్లు తెలిపారు. అక్రమ వసూళ్లకు పాల్పడుతుండటమే కాకుండా మున్సిపల్‌ ఉపాధ్యాయులను ఇబ్బందులకు గురిచేస్తున్నారని ఆరోపించారు. అతని డిప్యూటేషన్‌ను రద్దు చేయకుంటే ఆందోళన చేసే దిశగా ప్రత్యక్ష కార్యాచరణ చేపడతామని హెచ్చరించారు.