లీకుల ముప్పు.. ఏదీ కనువిప్పు..!

వెంకటాపురం, న్యూస్‌టుడే: మన్యానికి సాగునీటి వరదాయినిగా పేరొందిన వెంకటాపురం మండలంలోని పాలెంవాగు మధ్యతరహా జలాశయం నిర్వహణ గాడి తప్పింది. పంట పొలాలకు నీటిని సరఫరా చేసే ప్రధాన కాలువలో అంతర్భాగంగా రాళ్లవాగుపై నిర్మించిన కాంక్రీట్‌ అక్విడెక్టుకు లీకులు ఏర్పడ్డాయి. ఇన్నాళ్లు స్వల్పంగా ఉన్న బుంగలు కాస్తా పెద్దవిగా ఏర్పడి ముప్పును హెచ్చరిస్తున్నాయి. పెద్ద ఎత్తున సాగునీరు వృథా అవుతోంది. అక్విడెక్టు ఇరు వైపులా గోడలకు ఇదే పరిస్థితి దాపురించింది. ఆ బుంగలు మరింత పెద్దవిగా మారితే కట్టడం కూలే ప్రమాదం ఉన్నట్లు కర్షకులు ఆందోళన వ్యక్తం చేస్తున్నారు. ఇంత జరుగుతున్నా సంబంధిత శాఖ అధికారుల్లో కనువిప్పు లేకపోవడం విమర్శలకు దారి తీస్తోంది.