ఎర్రగట్టు గుట్టపై క్షీరాభిషేకం

హసన్‌పర్తి, న్యూస్‌టుడే: భీమారంలోని ఎర్రగట్టు గుట్టపై వెలసిన వేెంకటేశ్వరస్వామి బ్రహ్మోత్సవాలు వైభవంగా కొనసాగుతున్నాయి. నాలుగో రోజు గురువారం స్వామివారికి క్షీరాభిషేకం నిర్వహించారు. తెల్లవారుజామున 5 గంటల నుంచి అర్ధరాత్రి వరకు శ్రీదేవి-భూదేవి సమేత శ్రీనివాసుని దర్శించుకునేందుకు భక్తులు బారులుతీరారు.

ఉత్సవాలు ప్రారంభమైనప్పటి నుంచి ఇప్పటి వరకు సుమారు రెండు లక్షల మంది భక్తులు స్వామి వారిని దర్శించుకున్నట్లు ఈవో పి.కిషన్‌రావు తెలిపారు. అర్చకులు వేదాంతం పార్థసారథి చార్యులు, ఆరుట్ల శ్రీధరాచార్యులు, ఉత్సవ కమిటీ సభ్యులు స్వామి వారికి అభిషేకం చేశారు. కొండమీదున్న గండ దీపంలో భక్తులు నూనె పోసి  మొక్కులు చెల్లించుకున్నారు. విశ్వక్సేన సంస్థ ఆధ్వర్యంలో భక్తులకు నిత్యాన్నదాన కార్యక్రమం కొనసాగుతోంది.