Fancy number: బండి ధర ₹71 వేలు.. ఫ్యాన్సీ నంబర్‌కి ₹15 లక్షలు!

ఇంటర్నెట్‌ డెస్క్‌: మార్కెట్లో ఫ్యాన్సీ నంబర్లకు ఉన్న క్రేజ్‌ అంతా ఇంతా కాదు. ఖరీదైన కార్లు, బైకులకు తోడు ఫ్యాన్సీ నంబర్‌ ప్లేట్‌ ఉంటే ఆ కిక్కే వేరంటారు వాహన ప్రియులు. తాజాగా హరియాణా రాష్ట్రం చండీగఢ్‌కు చెందిన ఓ వ్యాపారి తనకు నచ్చిన వీఐపీ నంబరు కోసం ఏకంగా రూ. 15లక్షలు చెల్లించాడు. ఈ మధ్యకాలంలో ఇలాంటివి సాధారణమే కదా ఇందులో వింతేముంది అంటారా? అతను ఖరీదు చేసింది ఏ బెంజ్‌ కారు కోసమో కాదు. తన హోండా యాక్టీవా స్కూటర్‌ కోసం. దీని ధర రూ. 71 వేలు. ఈ వార్త సోషల్ మీడియాలో వైరల్‌గా మారింది.  చారాణా కోడికి బారాణా మసాలా అన్నట్టుగా ఇదెక్కడి పిచ్చిరా నాయనా అంటూ నెటిజన్లు కామెంట్లు చేస్తున్నారు.

ఫ్యాన్సీ నంబర్లను అమ్మకానికి ఉంచడం ద్వారా ఆదాయం సమకూర్చుకోవాలని రాష్ట్ర ప్రభుత్వం భావిస్తోంది. ఈ నేపథ్యంలో ఇటీవల అక్కడి రవాణా అధికారులు 0001 అనే సంఖ్యతో పూర్తయ్యే నంబరును రూ. 5లక్షలకు వేలానికి ఉంచారు. దీనికోసం ఎంతో మంది పోటీ పడగా బ్రిజ్‌ మోహన్‌ అనే  వ్యాపారి రూ. 15.44లక్షలకు దక్కించుకున్నాడు. ఈ వేలం ద్వారా రాష్ట్ర ప్రభుత్వానికి రూ. 5కోట్ల అదనపు ఆదాయం సమకూరిందని అధికారులు తెలిపారు.