Guntur: గుంటూరు జిల్లా అధికారులకు షాకిచ్చిన ఇసుక మాఫియా

తాడేపల్లి: గుంటూరు జిల్లా అధికారులకు ఇసుక మాఫియా గట్టి షాక్‌ ఇచ్చింది. తాడేపల్లి మండలం గుండిమెడ సమీపంలోని కృష్ణానదిలో అక్రమంగా ఇసుక తవ్వుతున్నారన్న సమాచారంతో శుక్రవారం రెవెన్యూ, గనులశాఖ అధికారులు దాడులు నిర్వహించారు. క్వారీలో ఇసుక తవ్వుతున్న జేసీబీ, లారీని జప్తు చేసి తాడేపల్లి తహసీల్దార్‌ కార్యాలయానికి తరలించారు. రెవెన్యూ కార్యాలయం వద్ద ఉన్న లారీని ఇసుక మాఫియా మారు తాళంతో ఎత్తుకెళ్లింది. దీంతో అధికారులు తలలు పట్టుకుంటున్నారు. జప్తు చేసిన లారీని పోలీస్‌ స్టేషన్లో అప్పగించకుండా తహసీల్దార్‌ కార్యాలయం వద్ద ఎందుకు పెట్టారనే అనుమానం వ్యక్తమవుతోంది. ఇసుక మాఫియాతో మాట్లాడుకునేందుకే లారీని స్టేషన్‌లో అప్పగించకుండా రెవెన్యూ కార్యాలయం దగ్గర పెట్టారని స్థానికులు అనుమానం వ్యక్తం చేస్తున్నారు.