Birbhum killings: తృణమూల్‌ నేతను ప్రశ్నించిన సీబీఐ.. 22 మందిపై ఎఫ్‌ఐఆర్‌

కోల్‌కతా: పశ్చిమ బెంగాల్‌లోని బీర్‌భూం జిల్లాలో 8 మంది సజీవ దహనం కేసు దర్యాప్తును సీబీఐ ముమ్మరంగా చేపడుతోంది. ఈ కేసులో ఇప్పటివరకు 22 మంది అనుమానితుల పేర్లను ఎఫ్‌ఐఆర్‌లో నమోదు చేసినట్లు తెలిపింది. రాష్ట్ర పోలీసులు సమర్పించిన జాబితాలోనూ ఇంతమంది పేర్లే ఉన్నట్లు సంబంధిత వర్గాలు తెలిపాయి. ఈ కేసులో ఇప్పటికే 20 మందిని అరెస్టు చేశారు. అధికార తృణమూల్ కాంగ్రెస్ పార్టీకి చెందిన బ్లాక్ ప్రెసిడెంట్ అనరుల్ హుస్సేన్‌ను సీబీఐ ప్రశ్నించింది. ఈ ఘటనపై మరింత సమాచారం సేకరించినట్లు తెలుస్తోంది.

అయితే ఈ హత్యను దుండగులు ‘ప్రతీకారం’తోనే జరిపినట్లు సీబీఐ శుక్రవారం వెల్లడించింది. తృణమూల్‌ కాంగ్రెస్‌ పార్టీ (టీఎంసీ)కి చెందిన బర్షాల్‌ గ్రామ పంచాయతీ ఉప ప్రధాన్‌ భాదు షేక్‌ హత్యకు ప్రతీకారంగానే ఈ హత్యలు జరిగినట్లు పేర్కొంది. వ్యక్తులను చంపాలనే ఉద్దేశంతోనే 70-80 మంది వ్యక్తుల గుంపు.. బాధితులను ఇళ్లలో ఉంచి నిప్పు పెట్టినట్లు సీబీఐ ఎఫ్‌ఆర్‌ నమోదు చేసింది.

మార్చి 21 అర్ధరాత్రి జరిగిన ఈ దుర్ఘటనలో దుండగులు బోగ్‌టూయిలోని పది ఇళ్లకు నిప్పు పెట్టారు. ఇద్దరు పిల్లలు సహా 8 మంది బుగ్గిపాలయ్యారు. హత్యకు ముందు బాధితులను కొట్టి అనంతరం సజీవదహనం చేసినట్లు పోస్టుమార్టం నివేదిక వెల్లడించింది. ఈ కేసులో ఇప్పటివరకు 20 మందిని అరెస్టు చేయగా.. పలువురు పోలీసులను సస్పెండు చేశారు.