పీఎం-కిసాన్‌లో నగదు పెంపు ప్రతిపాదన లేదు: కేంద్రం

దిల్లీ: రైతులను ఆదుకొనేందుకు తీసుకొచ్చిన ప్రధానమంత్రి కిసాన్‌ సమ్మాన్‌ నిధి (పీఎం-కిసాన్‌) పథకంలో నగదు పెంపు ప్రతిపాదన ఏదీ ప్రస్తుతానికి లేదని కేంద్ర వ్యవసాయ శాఖ మంత్రి నరేంద్రసింగ్‌ తోమర్‌ తెలిపారు. ఈ పథకం కింద అర్హులైన రైతులకు కేంద్రం ఏడాదికి మూడు విడతల్లో రూ.6 వేల మొత్తాన్ని ఇస్తున్న విషయం తెలిసిందే. 2018 డిసెంబరు నుంచి అమల్లోకి వచ్చిన ఈ పథకంలో.. ఈ ఏడాది జనవరి వరకు రూ.2.24 లక్షల కోట్లను కేంద్రం రైతుల ఖాతాల్లో జమ చేసింది. ఈ పథకంలో రైతులకు ఇచ్చే మొత్తాన్ని పెంచే ప్రతిపాదన ఉందా? అని లోక్‌సభలో అడిగిన ప్రశ్నకు.. ప్రస్తుతానికి లేదంటూ.. నరేంద్రసింగ్‌ తోమర్‌ మంగళవారం లిఖితపూర్వక సమాధానం ఇచ్చారు. ఈ పథకానికి కేంద్ర ప్రభుత్వమే 100 శాతం నిధులు సమకూరుస్తోంది.