ఏప్రిల్‌ 22లోగా బంగ్లా ఖాళీ చేయండి.. రాహుల్‌కు నోటీసు

దిల్లీ: కాంగ్రెస్‌ అగ్రనేత రాహుల్‌గాంధీకి కేంద్ర ప్రభుత్వం మరో షాకిచ్చింది. లోక్‌సభ సభ్యత్వాన్ని కోల్పోయిన ఆయన అధికార నివాసాన్ని కూడా కోల్పోబోతున్నారు. 12- తుగ్లక్‌లేన్‌లోని అధికార బంగ్లాను ఏప్రిల్‌ 22లోగా ఖాళీ చేయాలంటూ రాహుల్‌కు లోక్‌సభ హౌసింగ్‌ కమిటీ నోటీసులు జారీ చేసింది. ఈ నోటీసుల ప్రతిని అన్ని విభాగాలకూ పంపించారు. ఈ పరిణామంతో భాజపా-కాంగ్రెస్‌ మధ్య పోరు మరింత హోరెక్కే అవకాశాలు కనిపిస్తున్నాయి. లోక్‌సభ సభ్యుడిగా రాహుల్‌కు ఉండే ప్రయోజనాలన్నింటినీ అధికారులు పునఃపరిశీలిస్తున్నారు. కోర్టులో శిక్షపడిన నేపథ్యంలో రాహుల్‌.. లోక్‌సభ సభ్యత్వం రద్దయిన సంగతి తెలిసిందే. అందువల్ల- నిబంధనల ప్రకారం నెలరోజుల్లోపు అధికార నివాసాన్ని ఖాళీ చేయాల్సి ఉంటుంది. రాహుల్‌గాంధీ మరికొంత సమయం అడిగితే లోక్‌సభ హౌసింగ్‌ కమిటీ ఆ విజ్ఞప్తిని పరిశీలించి, తగిన కారణాలుంటే దానిపై ఒక నిర్ణయం తీసుకుంటుంది. 11 మంది సభ్యులున్న కమిటీకి భాజపా ఎంపీ సి.ఆర్‌.పాటిల్‌ నేతృత్వం వహిస్తున్నారు.