రైలు ప్రమాద మృతులను ఉంచిన పాఠశాల కూల్చివేత

భువనేశ్వర్‌, న్యూస్‌టుడే: ఒడిశాలోని బాలేశ్వర్‌ జిల్లా బహానగా పాఠశాలను కూల్చివేసి అక్కడ నూతన భవనం నిర్మించాలని ఆ రాష్ట్ర సీఎం నిర్ణయించారు. ఈ మేరకు బడి గదుల కూల్చివేత పనులు శుక్రవారం ప్రారంభమయ్యాయి. ఈ నెల 2న బహానగా వద్ద రైళ్లు ఢీకొనగా.. ఆ ప్రమాద మృతులను తొలుత పాఠశాల గదుల్లో భద్రపరిచారు. అనంతరం జిల్లా యంత్రాంగం గదులను శుభ్రం చేసి, శానిటైజ్‌ చేయించింది. అయినప్పటికీ విద్యార్థులు అందులోకి వచ్చేందుకు భయపడుతున్నారు. తల్లిదండ్రులూ సుముఖత వ్యక్తం చేయడం లేదు. ఈ విషయాన్ని కలెక్టర్‌.. సీఎం దృష్టికి తీసుకెళ్లారు. సీఎం ముఖ్యమంత్రి నవీన్‌ పట్నాయక్‌ జిల్లా అధికార యంత్రాంగంతో చర్చించి పాఠశాల కూల్చివేతకు ఆదేశాలిచ్చారు. అక్కడ కొత్త భవనం నిర్మించాలని, అందుకు వివరణాత్మక నివేదిక 15 రోజుల్లోగా సమర్పించాలని ఉత్తర్వులు జారీ చేశారు.