యూట్యూబ్‌ తొలగించిన వీడియోలు 22.5 లక్షలు

అమెరికా, రష్యా కంటే మనవే ఎక్కువ
2023 అక్టోబరు-డిసెంబరు త్రైమాసిక గణాంకాలు

దిల్లీ: సామాజిక మార్గదర్శకాలు ఉల్లంఘించినందుకు మన దేశానికి చెందిన 22.5 లక్షల వీడియోలను గత ఏడాది అక్టోబరు- డిసెంబరు మధ్య యూట్యూబ్‌ తొలగించింది. ఈ విషయంలో 30 దేశాల్లో అగ్రస్థానంలో మన దేశం ఉంది. జాబితాలో రెండో స్థానంలో సింగపూర్‌ ఉంది. ఆ దేశానికి చెందిన 12.43 లక్షల వీడియోలను తొలగించారు. అమెరికా (7.88 లక్షలు), ఇండొనేసియా (7.70 లక్షలు), రష్యా (5.16 లక్షలు) ఆ తర్వాతి స్థానాల్లో ఉన్నాయి. వీడియోలను అప్‌లోడ్‌ చేసిన దేశాల ప్రాతిపదికన గణాంకాలు నిర్ణయించారు. ప్రపంచం మొత్తంమీద 90 లక్షలకు పైగా వీడియోలను 2023లో తొలగించారు. వీటిలో 96% దృశ్యాలను మనుషుల కంటే ముందుగా యంత్రాలే గుర్తించడం విశేషం. ప్రమాదకరమైన అంశాలు, పిల్లల భద్రత, హింసాత్మకమైన/ గ్రాఫిక్‌ జోడించిన అంశాలు, నగ్న/ అశ్లీల దృశ్యాలు, తప్పుడు సమాచారం.. ఇలాంటివాటిని యూట్యూబ్‌ తొలగిస్తోంది. ప్రపంచవ్యాప్తంగా 2.05 కోట్ల ఛానళ్లను అక్టోబరు-డిసెంబరు మధ్య యూట్యూబ్‌ తొలగించింది. ఒక ఛానల్‌ను నిలిపివేసినప్పుడు దానిలో ఉన్న వీడియోలను తొలగిస్తారు. ఆ రకంగా చెప్పాలంటే 9,55,34,236 వీడియోలను తీసేసినట్లు లెక్క. 90 రోజుల గడువులో మూడుసార్లు మార్గదర్శకాలు ఉల్లంఘించినా, తీవ్రమైన దుష్ప్రవర్తనకు ఒక్కసారి పాల్పడినా ఆ ఛానల్‌ను తొలగిస్తున్నట్లు యూట్యూబ్‌ తెలిపింది.