Jaishankar: ‘దౌత్యవేత్తలకు భద్రత కల్పించడంలో బ్రిటన్‌ విఫలం..!’

బెంగళూరు: ఇటీవల బ్రిటన్‌ రాజధాని లండన్‌లోని భారత హైకమిషన్‌ (Indian High Commission) వద్ద ఖలిస్థానీ (Khalistan) అనుకూల వ్యక్తులు పాల్పడిన దుశ్చర్యలను విదేశాంగ మంత్రి ఎస్‌.జై శంకర్‌ (Jaishankar) తీవ్రంగా ఖండించారు. భద్రతా ప్రమాణాల విషయంలో తారతమ్యాలను భారత్ అంగీకరించదని స్పష్టం చేశారు. భారత దౌత్యవేత్తలకు భద్రత కల్పించే బాధ్యతను నెరవేర్చడంలో బ్రిటన్‌ (Britain) విఫలమైందని ఆరోపించారు. ‘ఏదైనా దేశం.. విదేశాలకు తమ దౌత్యవేత్తలను పంపినప్పుడు.. వారు తమ పని చేసుకునేందుకు వీలుగా భద్రతను కల్పించడం సంబంధిత దేశం బాధ్యత. కానీ, బ్రిటన్‌ ఈ బాధ్యతలను నెరవేర్చలేదు’ అని జైశంకర్‌ వ్యాఖ్యానించారు. బెంగళూరు (Bengaluru)లో నిర్వహించిన ఓ కార్యక్రమంలో ఆయన ఈ మేరకు మాట్లాడారు.

‘చాలా దేశాలు తమ సొంత భద్రత గురించి ఒక అభిప్రాయాన్ని, ఇతరుల భద్రత విషయానికొస్తే భిన్నమైన అభిప్రాయాన్ని కలిగి ఉంటాయి. కానీ, భారత్‌ ఇటువంటి భేదాలను అంగీకరించదు’ అని జైశంకర్‌ స్పష్టం చేశారు. బ్రిటన్‌ పర్యటనలో భాగంగా హక్కులపై రాహుల్ గాంధీ చేసిన వ్యాఖ్యల వ్యవహారంలో జైశంకర్ స్పందిస్తూ.. ‘భారత పాస్‌పోర్ట్‌లు కలిగి ఉన్నవారిలో చాలామందికి దేశంతో మంచి అనుబంధం ఉంది. కొద్దిమంది మాత్రమే.. వీసా లేదా నివాస హోదా పొందడం కోసం స్వదేశంలో వేధింపులకు గురవుతున్నట్లు చెప్పుకొంటారు. ఇదంతా రాజకీయాలు, హక్కుల పేరిట ఆడే  ‘వీసా గేమ్‌’’ అని పేర్కొన్నారు. హక్కులను కలిగి ఉండటం, వాటిని దుర్వినియోగం చేయడం మధ్య వ్యత్యాసం ఉందని తెలిపారు.