‘అమర్త్యసేన్ ఇంటిని తాకితే ఊరుకోను’.. యూనివర్సిటీకి మమత వార్నింగ్

కోల్‌కతా: ప్రముఖ ఆర్థికవేత్త అమర్త్యసేన్‌కు (Amartya Sen) పశ్చిమ బెంగాల్‌ సీఎం మమతా బెనర్జీ (Mamata Banerjee) అండగా నిలిచారు. ఆక్రమిత భూమిని ఖాళీ చేయాలంటూ అమర్త్యసేన్‌కు విశ్వభారతి విశ్వవిద్యాలయం షోకాజ్‌ నోటీసులు జారీ చేయడంపై ఆమె తీవ్రంగా మండిపడ్డారు. ‘అమర్త్యసేన్‌ ఇంటిని తాకితే ఏమి చేస్తానో నాకే తెలియదు’ అని గట్టి వార్నింగ్ ఇచ్చారు. ఒకవేళ ఆయన ఇంటిని ధ్వంసం చేస్తే అక్కడకి వెళ్లి కూర్చుంటానని హెచ్చరించారు. విశ్వభారతి యూనివర్శిటీ చర్యను ఏమాత్రం తాను సహించేది లేదని మమతా బెనర్జీ చెప్పారు. అమర్త్యసేన్‌కు అండగా నిలవాలని ఇప్పటికే పార్టీ నాయకులు, కార్యకర్తలకు ఆమె సూచించారు. యూనివర్సిటీ చర్యకు వ్యతిరేకంగా ఉద్యమించాలని సూచించారు.

అమర్త్యసేన్‌ నివాసం ఉంటున్న 1.38 ఎకరాల విస్తీర్ణంలో చట్టపరంగా ఆయన భూమి కేవలం 1.25 ఎకరాలు మాత్రమేనని, మిగతా భూమిని ఆయన ఆక్రమించుకున్నారని విశ్వభారతి విశ్వవిద్యాలయం ఆరోపిస్తోంది. మిగిలిన 13 సెంట్ల భూమిని ఖాళీ చేయాలని సూచించింది. ఈ వ్యవహారంపై ఇప్పటికే కోర్టుకు చేరింది. ఈ విషయంలో దిగువ న్యాయస్థానం ఉత్తర్వులు జారీ చేసే వరకు ఎలాంటి చర్యలూ తీసుకోకూడదంటూ కలకత్తా హైకోర్టు శుక్రవారం స్టే విధించింది. మే 10న దిగువ న్యాయస్థానంలో విచారణకు రానుంది.