Modi: సంత్‌ రవిదాస్‌ జయంతి.. మోదీ భజన కీర్తన

దిల్లీ: ప్రముఖ కవి సంత్‌ రవిదాస్‌ జయంతిని పురస్కరించుకుని ప్రధాన మంత్రి నరేంద్రమోదీ నేడు దిల్లీలోని గురు రవిదాస్‌ విశ్రామ్‌ ధామ్‌ మందిర్‌ను సందర్శించారు. అక్కడ రవిదాస్‌ విగ్రహాన్ని దర్శించుకుని ప్రార్థనలు చేశారు. ఈ సందర్భంగా మందిర్‌లోని భక్తులతో కొంతసేపు మాట్లాడిన ప్రధాని.. వారితో కలిసి భజన కీర్తనల్లో పాల్గొన్నారు. భక్తులతో కలిసి కీర్తనలు ఆలపించారు. ఈ వీడియోను మోదీ తన ట్విటర్‌ ఖాతా ద్వారా షేర్‌ చేస్తూ.. ‘‘ప్రత్యేక క్షణాలు’’ అని రాసుకొచ్చారు.

గురు రవిదాస్‌ జయంతి పంజాబ్‌ దళితుల ప్రముఖ పండగ. 15-16 శతాబ్దానికి చెందిన సంత్‌ రవిదాస్‌ తన కీర్తనలతో ప్రజలను చైతన్యవంతం చేశారు. ఆయనను ఆరాధించేవారు పంజాబ్‌తో పాటు ఉత్తరప్రదేశ్‌లో ఎక్కువ సంఖ్యలో ఉంటారు. రవిదాస్‌ జయంతిని పురస్కరించుకునే ఈ ఏడాది పంజాబ్‌ అసెంబ్లీ ఎన్నికల తేదీలను ఫిబ్రవరి 14 నుంచి ఫిబ్రవరి 20కి మార్చారు.

ఈ ఏడాది పంజాబ్‌ ఎన్నికలు అటు భాజపాకు, ఇటు కాంగ్రెస్‌కు ప్రతిష్ఠాత్మకంగా మారాయి. అమరీందర్‌ రాజీనామా, సిద్ధూ - చన్నీ విభేదాల వంటి అంతర్గత సమస్యలు ఈ ఎన్నికల్లో కాంగ్రెస్‌కు సవాల్‌గా మారాయి. అయితే వాటిని అధిగమించి మరోసారి రాష్ట్ర పగ్గాలు చేపట్టాలని హస్తం పార్టీ పట్టుదలతో ఉంది. మరోవైపు భాజపా కూడా విజయం కోసం గట్టిగానే ప్రయత్నిస్తోంది. ఎన్నికల ప్రచారంలో భాగంగా ప్రధాని మోదీ నేడు పఠాన్‌కోట్‌లో పర్యటించనున్నారు.