Yediyurappa: యడియూరప్పకు సుప్రీంలో ఊరట.. ఫిర్యాదుదారుకు నోటీసులు

దిల్లీ: కర్ణాటక మాజీ ముఖ్యమంత్రి బీఎస్‌ యడియూరప్పకు (B S Yediyurappa) అవినీతికి కేసులో ఊరట లభించింది. ఈ కేసు విచారణపై సుప్రీంకోర్టు (Supreme Court) శుక్రవారం స్టే విధించింది. ప్రైవేటు ఫిర్యాదుదారు అభ్యర్థన మేరకు విచారణ జరపాలన్న కర్ణాటక హైకోర్టు ఆదేశాల్ని సవాల్ చేస్తూ యడియూరప్ప ఉన్నత న్యాయాస్థానాన్ని ఆశ్రయించారు. ఈ నేపథ్యంలో జస్టిస్ డీవై చంద్రచూడ్, జస్టిస్ హిమా కోహ్లీతో కూడిన ధర్మాసనం ఈ కేసు విచారణపై తాజాగా స్టే విధించింది. యడియూరప్ప అవినీతికి పాల్పడ్డారని ఫిర్యాదు చేసిన వ్యక్తికి నోటీసులు జారీ చేసింది.

యడియూరప్ప ముఖ్యమంత్రిగా ఉన్న సమయంలో యడియూరప్ప కోట్లాది రూపాయలు ముడుపులు తీసుకుని బెంగళూరు డెవలప్​మెంట్ అథారిటీ(బీడీఏ) పరిధిలోని హౌసింగ్ ప్రాజెక్టు కాంట్రాక్టును ఓ కంపెనీకి ఇచ్చారని ప్రధాన ఆరోపణ. ఈ అంశంపై టీజే అబ్రహం అనే సామాజిక కార్యకర్త 2021 జూన్‌లో ప్రజాప్రతినిధుల ప్రత్యేక కోర్టులో పిటిషన్​ వేశారు. యడియూరప్ప, ఆయన కుమారుడు విజయేంద్ర, కుమార్తె పద్మావతి బంధువు శశిధర్‌ను నిందితులుగా పేర్కొన్నారు. అయితే,ప్రజాప్రతినిధుల ప్రత్యేక కోర్టు మొదట అబ్రహం పిటిషన్‌ను కొట్టివేసింది. దీనిపై ఆయన హైకోర్టు ఆశ్రయించారు. ఈ పిటిషన్‌ను పునఃపరిశీలించాలని న్యాయస్థానం ఆదేశించగా.. స్పెషల్ కోర్టు మరోసారి విచారణ జరిపింది. యడియూరప్ప, ఆయన కుటుంబ సభ్యులపై వచ్చిన అవినీతి ఆరోపణలపై సమగ్ర దర్యాప్తునకు ఆదేశించింది.