Bipin Rawat: బిపిన్ రావత్​ చివరి సందేశం విడుదల.. ఏం మాట్లాడారంటే..?

దిల్లీ: హెలికాప్టర్ ప్రమాదంలో మరణించిన సీడీఎస్ బిపిన్ రావత్ చివరి సందేశాన్ని భారత సైన్యం ఆదివారం విడుదల చేసింది. 1971లో పాకిస్థాన్‌పై జరిగిన యుద్ధంలో భారత విజయానికి గుర్తుగా.. దిల్లీలో నిర్వహించిన ‘స్వర్ణిమ్​ విజయ్‌ పర్వ్​’ కార్యక్రమంలో జనరల్​ రావత్​ చివరి వీడియో సందేశాన్ని ప్రసారం చేశారు. డిసెంబరు 7న రికార్డు చేసిన ఈ వీడియో ద్వారా.. స్వర్ణిమ్‌ విజయ్‌ పర్వ్‌ సందర్భంగా సైనికులకు శుభాకాంక్షలు తెలిపారు. ఆ యుద్ధంలో అమరులైన సైనికులకు రావత్ నివాళులు అర్పించారు. 1971 ఇండియా-పాక్‌ యుద్ధానికి 50 ఏళ్లు పూర్తయిన సందర్భంగా దిల్లీలోని ఇండియా గేట్​ వద్ద ఈ పలు రకాల కార్యక్రమాలు నిర్వహిస్తున్నట్లు అందులో తెలిపారు. భారత పౌరులు ఇందులో పాల్గొని విజయవంతం చేయాలని కోరారు.

ఆదివారం ఈ కార్యక్రమంలో పాల్గొన్న రక్షణ శాఖ మంత్రి రాజ్​నాథ్​ సింగ్ అమరవీరులకు నివాళులర్పించారు. ఈ కార్యక్రమాన్ని తొలుత ఘనంగా నిర్వహించాలని భావించినా.. దేశ తొలి సీడీఎస్ జనరల్ బిపిన్​ రావత్​ అకాల మరణంతో నిరాడంబరంగా జరుపుతున్నట్లు రాజ్​నాథ్​ పేర్కొన్నారు. ఈ సందర్భంగా రావత్​ను స్మరించుకుంటూ నివాళులర్పించారు. ‘ఈ వేడుక దక్షిణాసియా చరిత్ర, భౌగోళిక స్థితిని మార్చిన భారత సైన్యం అద్భుతమైన విజయానికి గుర్తు. ఆ యుద్ధంలో అమరులైన ప్రతి సైనికుడి ధైర్యానికి, పరాక్రమానికి, త్యాగానికి నమస్కరిస్తున్నాను. ఆ ధైర్యవంతులందరి త్యాగానికి దేశం ఎప్పుడూ రుణపడి ఉంటుంది. ఈ యుద్ధం మన నైతికతకు, మన ప్రజాస్వామ్య సంప్రదాయాలకు, న్యాయంగా వ్యవహరించడానికి గొప్ప ఉదాహరణ’ అని రాజ్‌నాథ్‌సింగ్‌ వ్యాఖ్యానించారు.

1971లో తూర్పు పాకిస్థాన్‌లో స్వతంత్ర పోరు మొదలై.. భారత్‌-పాక్‌ మధ్య యుద్ధానికి దారితీసింది. ఇందులో పాక్‌ను భారత్‌ ఓడించింది. ఆ తర్వాత బంగ్లాదేశ్ ఏర్పడింది. ఆ విజయానికి గుర్తుగా ఏటా డిసెంబరు 16న విజయ్‌ దివస్‌ నిర్వహిస్తున్నారు. ఆ​ యుద్ధంలో భారత్‌ విజయానికి 50 ఏళ్లు పూర్తయిన సందర్భంగా ‘స్వర్ణ విజయ సంవత్సరం’గా పేర్కొంటూ ఏడాదిపాటు దేశవ్యాప్తంగా వేడుకలను నిర్వహిస్తున్నారు.