IAF Aircraft crash: భారత వాయుసేన.. రెండేళ్లలోనే ఎన్ని ప్రమాదాలంటే!

ఈ మధ్యే వెల్లడించిన కేంద్ర ప్రభుత్వం

దిల్లీ: తమిళనాడులో జరిగిన హెలికాప్టర్‌ ప్రమాదంలో భారత చీఫ్‌ ఆఫ్‌ డిఫెన్స్‌ స్టాఫ్‌ జనరల్‌ బిపిన్‌ రావత్‌ సహా 13 మంది ప్రాణాలు కోల్పోయిన విషయం తెలిసిందే. అయితే, ఇటువంటి ఘటనలు భారత వాయుసేనలో గత కొంతకాలంగా పెరగడం కలవరపెడుతోంది. ఈ మధ్యే మధ్యప్రదేశ్‌లో కుప్పకూలిన మిరాగ్‌ 2000తో పాటు గడిచిన రెండేళ్లలో మొత్తం ఏడు సైనిక విమాన ప్రమాదాలు చోటుచేసుకున్నట్లు ఈ మధ్యే కేంద్ర రక్షణశాఖ వెల్లడించింది. అయితే, ప్రమాదాలకు గల కారణాలను అన్వేషించేందుకు ఇప్పటికే కోర్ట్‌ ఆఫ్‌ ఎంక్వైరీకి ఆదేశించినట్లు తెలిపింది.

భారత వాయుసేనలో చోటుచేసుకుంటున్న విమాన ప్రమాదాలపై కేంద్ర రక్షణశాఖ సహాయమంత్రి అజయ్‌ భట్‌ ఈమధ్యే లోక్‌సభలో ఓ ప్రకటన చేశారు. గడిచిన రెండేళ్లలోనే ఏడు సైనిక విమాన ప్రమాదాలు చోటుచేసుకున్నాయన్న ఆయన.. భవిష్యత్తులో ఇటువంటి సంఘటనలు జరగకుండా చర్యలు తీసుకుంటున్నామన్నారు. అంతకుముందు 2014-19 కాలంలోనూ దాదాపు 10 ప్రమాదాలు చోటుచేసుకున్నాయని అప్పటి రక్షణశాఖ సహాయమంత్రి శ్రీపాద నాయక్‌ వెల్లడించారు. ఆయా ఘటనల్లో మొత్తం 46 మంది సిబ్బంది ప్రాణాలు కోల్పోయినట్లు వివరించారు.

ఈ మధ్య కాలంలో చోటుచేసుకున్న సైనిక విమాన ప్రమాదాలు..

* ఈ ఏడాది అక్టోబర్‌ 21న మధ్యప్రదేశ్‌లోని భింద్‌ జిల్లాలో భారత వాయుసేనకు చెందిన మిరాగ్‌ 2000 కుప్పకూలింది.

* ఐఏఎఫ్‌కు చెందిన MiG-21 విమానం ఆగస్టు నెలలో రాజస్థాన్‌లో ప్రమాదానికి గురయ్యింది.

* ఈ ఏడాది మేలో పంజాబ్‌లో జరిగిన వైమానిక శిక్షణా విమానం కూలిన ఘటనలో పైలట్‌ మృతిచెందారు.

* ఇదే సంవత్సరం మార్చి నెలలో మధ్యప్రదేశ్‌లో చోటుచేసుకున్న MiG-21 ప్రమాదంలో గ్రూప్‌ కెప్టెన్‌ ఆశీష్‌ గుప్తా ప్రాణాలు కోల్పోయారు.

* తాజాగా తమిళనాడులో జరిగిన ప్రమాదంలో ఏకంగా 13 మంది సైనిక ఉన్నతాధికారులు దుర్మరణం చెందారు.