viral video: వంతెనపై నుంచి వేలాడుతూ.. కదులుతున్న రైల్లో చోరీ..

ఇంటర్నెట్‌డెస్క్‌:  నదీ అందాలను సెల్‌ఫోన్‌లో చిత్రీకరిస్తుండగా.. సినీఫక్కీలో చోరీ చేసిన ఘటనకు సంబంధించిన ఓ వీడియో ఇంటర్నెట్‌లో వైరల్‌గా మారింది. ఈ ఘటనలో దొంగను నెటిజన్లు స్పైడర్‌ మ్యాన్‌తో పోలుస్తున్నారు. ఈఘటన బిహార్‌లోని బేగుసరై వద్ద గంగానది వంతెనపై చోటు చేసుకొంది. ఈ వీడియోలో రైలు గంగానది వంతెనపైనుంచి ప్రయాణిస్తుండగా.. ఇద్దరు యువకులు కంపార్ట్‌మెంట్‌ మెట్లపై కూర్చొని నదిని తమ మొబైల్‌ఫోన్‌లో చిత్రీకరిస్తున్నారు. అప్పటికే వంతెన పక్కనే ఉన్న ఇనుప దిమ్మెను పట్టుకొని వేలాడుతున్న ఓ వ్యక్తి.. రెప్పపాటులో ముందుకు వంగి కదలుతున్న రైల్లో ఉన్న వారి చేతిలోని మొబైల్‌ ఫోన్‌ను లాక్కొన్నాడు. ఫొన్‌ పోగొట్టుకొన్న వ్యక్తికి అసలేం జరిగిందో కూడా కాసేపు అర్థం కాలేదు.

ఈ తతంగం మొత్తం రైల్లో ప్రయాణిస్తోన్న మరో వ్యక్తి మొబైల్‌ ఫోన్‌లో రికార్డైంది. ఈ వీడియో క్లిప్‌ను స్లోమోషన్‌లో పరిశీలిస్తే గానీ..  ఫోన్‌ చోరీ జరిగినట్లు తెలియదు. బేగుసరై వద్ద రాజేంద్ర సేతుపై పట్నా-కథియార్‌ ఇంటర్‌ సిటీ ఎక్స్‌ప్రెస్‌  వెళ్తోన్న సమయంలో ఈ ఘటన చోటుచేసుకుంది. ఇక్కడ దొంగలు రైలు తలుపుల వద్ద కూర్చొన్న ప్రయాణికులను లక్ష్యంగా చేసుకొని చోరీలకు పాల్పడుతున్నారు. పోలీసులు ఇప్పటికే కొంతమంది దొంగలను అరెస్టు చేసినా.. ఇటువంటి ఘటనలు మాత్రం ఆగడంలేదు.