చార్‌ధామ్‌ యాత్ర లైవ్‌ స్ట్రీమింగ్ కుదరదు

ఉత్తరాఖండ్‌: చార్‌ధామ్‌ యాత్రను, బద్రీనాథ్‌, కేదార్‌నాథ్‌, గంగోత్రి, యమునోత్రి గర్భాలయాల్లో నిర్వహించే కైంకర్యాలను లైవ్‌స్ట్రీమ్‌ చేయడం కుదరదని ఉత్తరాఖండ్‌ ముఖ్యమంత్రి పుష్కర్‌ సింగ్‌ ధామి స్పష్టం చేశారు. హైకోర్టు సూచనపై పలువురితో సంప్రదించామనీ, అయితే  ఇది ఆగమాలకు విరుద్ధంగా ఉన్నందున ఆచరణలోకి తీసుకురాలేకపోతున్నామని తెలిపారు. ఈ మేరకు సీఎం అధ్యక్షతన నిర్వహించిన కేబినెట్‌ సమావేశంలో నిర్ణయం తీసుకున్నారు.

కరోనా ఉద్ధృతి నేపథ్యం ప్రసిద్ధ చార్‌ధామ్‌ యాత్రను ఈ ఏడాదికి పూర్తిగా రద్దు చేయాల్సిందిగా గతంలో ఉత్తరాఖండ్‌ హైకోర్టు ఆదేశాలు జారీ చేసింది. అయితే ఈ ఆదేశాలను తోసిరాజని స్థానిక ప్రజలు, తక్కువ మంది భక్తులతో చార్‌ధామ్‌ యాత్రను నిర్వహిస్తున్నట్లు ప్రభుత్వం ఉత్తర్వులు జారీ చేసింది. జులై 1 నుంచి మొదటి దశ, జులై 11 నుంచి రెండో దశ యాత్రను నిర్వహిస్తున్నట్లు పేర్కొంది. ప్రభుత్వ నిర్ణయాన్ని సవాల్‌ చేస్తూ హైకోర్టులో ప్రజాప్రయోజన వ్యాజ్యం దాఖలైంది. దీనిపై విచారణ చేపట్టిన న్యాయస్థానం ప్రభుత్వ ఉత్తర్వులపై స్టే విధించింది. తదుపరి ఆదేశాలు ఇచ్చే వరకు స్టే కొనసాగుతుందని స్పష్టం చేసింది. వీలైతే ఆయా ఆలయాల్లో నిర్వహించే కైంకర్యాలను లైవ్‌ స్ట్రీమ్‌ ద్వారా ప్రసారం చేసుకోమని సూచించింది.

దీనిపై పలువురు ఆధ్యాత్మిక వేత్తలు, మతపెద్దలతో సంప్రదింపులు జరిపిన ఉత్తరాఖండ్‌ ప్రభుత్వం లైవ్‌ స్ట్రీమింగ్‌ చేయడం సాధ్యం కాదని తేల్చి చెప్పింది. ఉత్తరాఖండ్‌లోని బద్రీనాథ్‌, కేదార్‌నాథ్‌, యమునోత్రి, గంగోత్రిలను కలిపి చార్‌ధామ్‌గా పిలుస్తారు.