నిహారిక ప్లేస్‌ను రీప్లేస్‌ చేసిన మేఘా ఆకాశ్‌

నాకెంతో సంతోషంగా ఉంది: నటి

చెన్నై: త్వరలో ప్రారంభం కానున్న ఓ సినిమాలో నిహారిక కొణిదెల ప్లేస్‌ను నటి మేఘా ఆకాశ్‌ రీప్లేస్‌ చేశారు. అశోక్‌ సెల్వన్‌ హీరోగా స్వాతిని దర్శకత్వంలో కోలీవుడ్‌లో ఓ ప్రేమకథా చిత్రం తెరకెక్కనుంది. అయితే ఈ సినిమాలో హీరోయిన్‌ పాత్రకోసం మొదట చిత్రబృందం నిహారికను ఎంపిక చేసుకుంది. వేసవిలో ప్రారంభం కావాల్సిన ఈ సినిమా షూటింగ్‌ కొవిడ్‌-19 విజృంభణ కారణంగా వాయిదా పడింది. ఇటీవల నిశ్చితార్థంతో వివాహబంధంవైపు అడుగులువేసిన నిహారిక ప్రస్తుతం వేరే ప్రాజెక్ట్‌లను పూర్తి చేసే పనిలో ఉన్నారు. దీంతో ఆమె సదరు కోలీవుడ్‌ సినిమా నుంచి తప్పుకుంటున్నట్లు చిత్ర నిర్మాతకు తెలియజేశారు.

కాగా, ఈ సినిమాలో కథానాయికగా మేఘా ఆకాశ్‌ను ఎంపిక చేసుకున్నట్లు నిర్మాత సెల్వాకుమార్‌ తెలిపారు. ‘ఎంతో టాలెంట్‌ కలిగిన మేఘా ఆకాశ్‌ మా సినిమాలో భాగం కావడం చాలా సంతోషంగా ఉంది. మా ఈ చిత్రంలోని కథానాయిక పాత్ర ఎంతో విభిన్నంగా కనిపించనుంది. సదరు పాత్రకు మేఘా చక్కగా నప్పుతుందని దర్శకురాలు స్వాతిని చెప్పడంతో ఆలోచించాను. మేఘా ఈ కథకు సరిగ్గా సరిపోతుందనిపించింది. లాక్‌డౌన్‌ సడలింపుల్లో భాగంగా ప్రభుత్వం షూటింగ్స్‌కు అనుమతినిచ్చిన విషయం తెలిసిందే. దీంతో అక్టోబర్‌లో షూటింగ్‌ ఆరంభించనున్నాం.’ అని ఆయన వెల్లడించారు.

‘కథానాయిక పాత్రకు ఎంతో ప్రాముఖ్యతనిచ్చే విభిన్నమైన కథల్లో నటించే అవకాశం రావడం ఓ హీరోయిన్‌కు అదృష్టం అనే చెప్పాలి. అలాంటి అవకాశాలను పొందడం సులువు కాదు. దర్శకురాలు స్వాతిని కథను వినిపించిన వెంటనే ఆ పాత్రలోకి పరకాయప్రవేశం చేశాను. ఇలాంటి మంచి సినిమాలో భాగమైనందుకు ఎంతో సంతోషిస్తున్నాను.’ అని మేఘా ఆకాశ్‌ అన్నారు.