Venkatesh: ఆ పాత్రలో వెంకీ

తమిళంలో విజయవంతమైన ‘ఓ మై కడవులే’ చిత్రాన్ని తెలుగులో ‘ఓరి దేవుడా’ పేరుతో రీమేక్‌ చేస్తున్న సంగతి తెలిసిందే. విష్వక్‌ సేన్‌ హీరోగా నటిస్తున్న చిత్రమిది. మాతృకను తెర కెక్కించిన అశ్వత్‌ మరిముత్తు ఈ తెలుగు సినిమాకీ దర్శకత్వం వహిస్తున్నారు. ఇందులో దేవుడి పాత్ర చాలా కీలకం. మాతృకలో ఈ పాత్రను విజయ్‌ సేతుపతి పోషించారు. ఇప్పుడీ పాత్రను తెలుగులో కథానాయకుడు వెంకటేష్‌ చేయనున్నారు. ఇప్పటికే కథా చర్చలు పూర్తయ్యాయని.. ఈ అతిథి పాత్ర కోసం వెంకీ మూడు రోజుల కాల్షీట్లు కేటాయించారని సమాచారం. ఇప్పటికే వెంకటేష్‌ పార్ట్‌ మినహా చిత్రీకరణ మొత్తం పూర్తయింది. నిర్మాణాంతర పనులు శరవేగంగా జరుగుతున్నాయి. త్వరలో వెంకీ పాత్రకు సంబంధించిన సన్నివేశాల్ని పూర్తి చేసి.. సినిమా ప్రేక్షకుల ముందుకు తీసుకురానున్నారు. ఈ చిత్రంలో విష్వక్‌కు జోడీగా మిథాలీ పార్కర్‌ నటిస్తోంది.