Manchu Vishnu: తెలుగు సినిమా 90ఏళ్ల వేడుకలు మలేసియాలో

తెలుగు చలన చిత్ర పరిశ్రమ 90ఏళ్లు పూర్తి చేసుకున్న సందర్భంగా తెలుగు సినిమా ఘన కీర్తిని చాటి చెప్పేందుకు ‘నవతిహి’ పేరుతో వేడుకలు నిర్వహించనుంది మూవీ ఆర్టిస్ట్‌ అసోసియేషన్‌ (మా). ఈ విషయాన్ని ‘మా’ అధ్యక్షుడు, హీరో మంచు విష్ణు ప్రకటించారు. ఈ మేరకు ఆయన ఆధ్వర్యంలో శనివారం హైదరాబాద్‌లో విలేకర్ల సమావేశం ఏర్పాటు చేశారు. ఈ సందర్భంగా విష్ణు మాట్లాడుతూ.. ‘‘తెలుగు సినిమా 90ఏళ్ల చరిత్రను ‘నవతిహి ఉత్సవం’ పేరిట ‘మా’ తరఫున ఘనంగా నిర్వహించనున్నాం. మలేసియాలోని కౌలాలంపూర్‌ వేదికగా జులై నెలలో ఈ వేడుకలు నిర్వహించనున్నాం. సినీ పెద్దలతో చర్చించి.. వారి ఆశీసులతో వేడుకలకు సంబంధించిన తేదీలను ప్రకటిస్తాం. ఈ మేరకు జులైలో చిత్రీకరణలకు మూడు రోజులు సెలవులు ఇవ్వాలని తెలుగు చలన చిత్ర వాణిజ్య మండలి అధ్యక్షుడు దిల్‌రాజును కోరాం. దానికి ఆయన సానుకూలంగా స్పందించారు. ఈ వేడుకల ద్వారా ఫండ్‌ రైజ్‌ చేసి, ఆ మొత్తాన్ని ఆర్థికంగా ఇబ్బందులు పడుతున్న ‘మా’ సభ్యుల కోసం ఉపయోగించనున్నాం. ‘మా’ ప్రస్తుతం దేశంలోని ఐదు అసోసియేషన్లతో ఒప్పందం చేసుకుంది. ఈ వేడుకలకు ఇతర చిత్ర పరిశ్రమలకు చెందిన నటీనటులు కూడా కొందరు రానున్నారు. ప్రస్తుతం తెలుగు చిత్ర పరిశ్రమ స్వర్ణయుగంలో ఉంది. ఈ సమయంలో నటీనటులుగా ఉన్నందుకు గర్వపడుతున్నాం. చిరంజీవికి పద్మవిభూషణ్‌ రావడం గర్వించాల్సిన విషయం’’ అన్నారు. ఈ కార్యక్రమంలో ‘మా’ ఉపాధ్యక్షుడు మాదాల రవి, కోశాధికారి శివ బాలాజీ, పలువురు మలేసియా ప్రతినిధులు పాల్గొన్నారు.

‘మా’ భవనంపై ఎన్నికల తర్వాత ప్రకటన

ఎన్నికలు పూర్తయిన వెంటనే ‘మా’ భవనంకు సంబంధించి ఓ మంచి ప్రకటన రానుందన్నారు మంచు విష్ణు. ‘మా’ కార్యాలయం ఎక్కడ ఉండాలనే విషయంలో జనరల్‌ బాడీ సమావేశంలో చర్చించామని.. ‘మా’ సభ్యులంతా కొత్తగా నిర్మించనున్న ఫిల్మ్‌ ఛాంబర్‌ కార్యాలయంలోనే దాన్ని ఏర్పాటు చేయాలని కోరినట్లు తెలిపారు. ఇప్పటికే ఈ విషయమై ఫిల్మ్‌ ఛాంబర్‌ అధ్యక్షుడు దిల్‌రాజుతో పాటు పలువురు సినీ పెద్దలతో చర్చించినట్లు చెప్పారు. వాళ్ల నిర్ణయం ఆధారంగా త్వరలో తాము ‘మా’ భవనంపై కార్యాచరణ రూపొందిస్తామన్నారు. అలాగే ఇక ‘మా’ ఎన్నికల్లో పోటీ చేయనని స్పష్టత ఇచ్చారు విష్ణు.