Turbo: ‘టర్బో’ జోస్‌ వచ్చేది జూన్‌లో

‘భ్రమయుగం’లోని తన నటనతో అభిమానులను ఆశ్చర్యానికి గురిచేసి ఈ ఏడాదిని విజయవంతంగా మొదలుపెట్టారు మలయాళ అగ్రకథానాయకుడు మమ్ముట్టి. కథ మాత్రమే కాదు.. పాత్ర ఏదైనా ప్రేక్షకులను అలరించడమే లక్ష్యంగా ఈసారి ‘టర్బో’ కోసం యాక్షన్‌ అవతారంలో వచ్చేందుకు తేదీని ఖరారు చేసుకున్నారీయన. వైశాక్‌ దర్శకత్వంలో రానున్న మాస్‌ యాక్షన్‌ థ్రిల్లర్‌ చిత్రమే ఈ ‘టర్బో’. మమ్ముట్టి సొంత నిర్మాణ సంస్థ మమ్ముట్టి కంపెనీ పతాకంపై రూపొందుతోందీ చిత్రం. ఇందులో టర్బో జోస్‌ పాత్రలో ఆయన కనిపించనున్నారు. తాజాగా ఈ సినిమా జూన్‌ 13న విడుదల కానున్నట్లు చిత్రబృందం అధికారికంగా ప్రకటించింది. అందుకు సంబంధించిన పోస్టర్‌ను సామాజిక మాధ్యమాల వేదికగా పంచుకుంది. ఆ పోస్టర్‌లో వాహనంపై కూర్చొని, రాయల్‌ లుక్‌లో కనిపిస్తున్న మమ్ముట్టి చిత్రంపై ఆసక్తిని పెంచుతున్నారు. తెలుగు నటుడు సునీల్‌, అంజనా జయప్రకాశ్‌, రాజ్‌ బి శెట్టి కీలక పాత్రల్లో కనిపించనున్నారు.