Tollywood: ‘డీజే టిల్లు’ రిలీజ్‌ డేట్‌ ఫిక్స్‌.. ‘లైగర్‌’ షూట్‌ అప్‌డేట్‌

ఇంటర్నెట్‌ డెస్క్‌: సిద్ధు జొన్నలగడ్డ హీరోగా రూపొందిన చిత్రం ‘డీజే టిల్లు’. అట్లుంటది మనతోని అనేది ఉపశీర్షిక. నేహాశెట్టి కథానాయిక. విమల్‌కృష్ణ దర్శకుడు. ఈ సినిమాని ఫిబ్రవరి 12న ప్రేక్షకుల ముందుకు తీసుకొస్తున్నట్టు చిత్ర నిర్మాణ సంస్థ సితార ఎంటర్‌టైన్‌మెంట్స్‌ శుక్రవారం ప్రకటించింది. ఈ మేరకు సోషల్‌ మీడియా వేదికగా ఓ పోస్టర్‌ను విడుదల చేసింది. ఇందులో నాయకానాయికలు రొమాంటిక్‌గా కనిపించారు. ఇటీవల విడుదలైన ఈ చిత్రంలోని పాటలు, ట్రైలర్‌కు విశేష స్పందన లభించింది. శ్రీ చరణ్‌ పాకాల స్వరాలు సమకూర్చిన ఈ సినిమాకి తమన్‌ నేపథ్య సంగీతం అందించారు.

ముంబయిలో లైగర్‌

విజయ్‌ దేవరకొండ హీరోగా పూరి జగన్నాథ్‌ తెరకెక్కిస్తోన్న పాన్‌ ఇండియా చిత్రం ‘లైగర్‌’. సాలా క్రాస్‌ బ్రీడ్‌ అనేది ట్యాగ్‌లైన్‌. ఈ సినిమా షూటింగ్‌ తుది దశకు చేరుకుంది. ప్రస్తుతం.. ముంబయిలో చివరి షెడ్యూల్‌ చిత్రీకరణ సాగుతోంది. ఈ షూట్‌లో విజయ్‌తోపాటు కీలక పాత్రధారులంతా పాల్గొన్నారు. మిక్స్‌డ్‌ మార్షల్‌ ఆర్ట్స్‌ నేపథ్యంలో తెరకెక్కుతోన్న ఈ సినిమా కోసం విజయ్‌ ప్రత్యేక శిక్షణ తీసుకున్నారు. ప్రముఖ బాక్సర్‌ మైక్‌ టైసన్‌ ఈ చిత్రంలో ముఖ్య భూమిక పోషించారు. అనన్య పాండే కథానాయిక. రమ్యకృష్ణ, విష్ణురెడ్డి, గెటప్‌ శ్రీను తదితరులు నటిస్తున్న ఈ సినిమాని ధర్మ ప్రొడక్షన్స్‌, పూరీ కనెక్ట్స్‌ సంస్థలు సంయుక్తంగా నిర్మిస్తున్నాయి. ఈ చిత్రం ఆగస్టు 25న ప్రేక్షకుల ముందుకురానుంది. ఈ సినిమాకి ఛాయాగ్రహణం: విష్ణుశర్మ, కూర్పు: జునైద్‌ సిద్ధిఖి, కళ: జానీ షేక్‌ బాషా.