Sai Dharam Tej: సాయిధరమ్‌ తేజ్‌ తాజా ఆరోగ్య పరిస్థితి ఇదే!

హైదరాబాద్‌: రోడ్డు ప్రమాదంలో గాయపడి హైదరాబాద్‌లోని అపోలో ఆస్పత్రిలో చికిత్స పొందుతున్నారు నటుడు సాయిధరమ్‌ తేజ్‌. తాజాగా ఆయన ఆరోగ్య పరిస్థితిపై ఆస్పత్రి వర్గాలు బులిటెన్‌ విడుదల చేశాయి. సాయి ధరమ్ తేజ్ ఆరోగ్యం నిలకడగా ఉందని వైద్యులు తెలిపారు. వెంటిలేటర్‌ అవసరం క్రమంగా తగ్గుతోందని, శరీరంలోని ముఖ్య భాగాలన్నీ బాగానే పనిచేస్తున్నాయని వివరించారు. ఈరోజు చేసిన పరీక్షల నివేదికలన్నీ సానుకూలంగా వచ్చినట్లు తెలిపారు.

శుక్రవారం రాత్రి స్పోర్ట్స్‌ బైక్‌పై ప్రయాణిస్తున్న సాయితేజ్‌ ప్రమాదవశాత్తూ కిందపడిపోయారు. ఈ ఘటనలో ఆయనకు తీవ్రగాయాలు అయ్యాయి. నగరంలోని కేబుల్‌ బ్రిడ్జ్‌-ఐకియా సమీపంలో ఈ ప్రమాదం జరిగింది. మెడికవర్‌లో ప్రాథమిక చికిత్స అనంతరం ఆయన్ను అపోలో ఆసుపత్రికి తరలించారు.