Salaar: ఇద్దరూ కలిసి కదిలితే కదనమే

‘సూరీడే గొడుగు పట్టి..వచ్చాడే భుజము తట్టి.. చిమ్మచీకటి నీడలా ఉండెటోడు’ అంటూ ‘సలార్‌’ ప్రపంచంలోకి ప్రేక్షకులను తీసుకెళ్లారు ప్రముఖ కథానాయకుడు ప్రభాస్‌. ఆయన ప్రధాన పాత్రలో నటిస్తున్న ఈ చిత్రాన్ని ప్రశాంత్‌ నీల్‌ తెరకెక్కించారు. శ్రుతిహాసన్‌ కథానాయిక. పృథ్వీరాజ్‌ సుకుమారన్‌ కీలక పాత్ర పోషిస్తున్నారు. ఎన్నో అంచనాల మధ్య ఈ నెల 22న విడుదలకు సిద్ధమవుతున్న ఈ సినిమాలోని ‘సూరీడే..’ అంటూ సాగే మొదటి పాటను బుధవారం విడుదల చేసింది చిత్రబృందం. ‘సెగ ఒకడు.. సైన్యమొకడు.. కలిసి కదిలితే కదనమే. ఒకరికొకరని నమ్మి నడిచిన స్నేహమే ఇదేలే.. నూరేళ్లు నిలవాలే’ అంటూ స్నేహ బంధాన్ని తెలిపేలా సాగుతున్న ఈ పాట హృదయాల్ని హత్తుకుంటోంది. రవిబస్రూర్‌ సంగీతమందించారు. కృష్ణకాంత్‌ సాహిత్యమందించిన ఈ గీతాన్ని హరిణి ఆలపించారు. హోంబలే ఫిలింస్‌ నిర్మించింది.