రామ్‌ కొత్తసాంగ్‌ విన్నారా

హైదరాబాద్‌: తనదైన శైలిలో జానపద గీతాల్ని ఆలపించి ఎంతోమంది సంగీత ప్రియుల్ని అలరిస్తున్నారు రామ్‌ మిరియాల. ‘జాతిరత్నాలు’ కోసం ఇటీవల ఆయన పాడిన ‘చిట్టి నీ నవ్వంటే’ పాట మంచి హిట్‌ అయిన విషయం తెలిసిందే. ఈ క్రమంలోనే రామ్‌ నుంచి మరో సాంగ్‌ వచ్చేసింది. ఆనంద్‌ దేవరకొండ కథానాయకుడిగా తెరకెక్కుతోన్న ‘పుష్పక విమానం’ కోసం రామ్‌ ‘సిలకా ఎగిరిపోయావా ఆశలన్నీ ఇడిసేసి యెనకా’ అనే పాట పాడారు. తాజాగా ఈ పాట లిరికల్‌ వీడియోని విజయ్‌ దేవరకొండ విడుదల చేశారు. గ్రామీణ యాసలో సాగే ఈ పాట ఆకట్టుకునేలా ఉంది.

‘మిడిల్‌క్లాస్‌ మెలోడీస్‌’ తర్వాత ఆనంద్‌ దేవరకొండ నటిస్తున్న చిత్రం ‘పుష్పక విమానం’. గీత్‌ షైనీ, శాన్వీ మేఘన కథానాయికలు. దామోదర దర్శకుడు. ప్రేమ, కుటుంబకథా చిత్రంగా తెరకెక్కుతోన్న ఈ సినిమాలో ఆనంద్‌ విభిన్నమైన లుక్‌లో సందడి చేయనున్నారు. ఇప్పటికే విడుదలైన ఈ సినిమా ఫస్ట్‌లుక్‌ పోస్టర్‌ ప్రతిఒక్కర్నీ ఆకర్షించింది. ఈ చిత్రాన్ని విజయ్‌ దేవరకొండ నిర్మిస్తున్నారు.