Ishq: చీకటి చిరుజ్వాలై నిప్పులుకురిసిందే

హైదరాబాద్‌: బాలనటుడిగా ఎన్నో సినిమాల్లో నటించి ప్రేక్షకులకు చేరువైన నటుడు తేజ. ‘జాంబీరెడ్డి’తో కథానాయకుడిగా పరిచయమైన ఆయన నటించిన సరికొత్త చిత్రం ‘ఇష్క్‌’. ఎస్‌.ఎస్‌.రాజు దర్శకత్వం వహించిన ఈ సినిమా జులై 30న థియేటర్లలో విడుదల కానుంది. ఈ నేపథ్యంలో తాజాగా ఈ సినిమా నుంచి ఓ సరికొత్త పాటను చిత్రబృందం విడుదల చేసింది. ‘చీకటి చిరుజ్వాలై నిప్పులు కురిసిందే’ అంటూ సాగే ఈ పాటకు శ్రీమణి లిరిక్స్‌ అందించారు. మహతి స్వర సాగర్‌ సంగీతం అందించిన ఈ పాటను అనురాగ్‌ కులకర్ణి, ఉమా నేహా ఆలపించారు. లవ్‌, సస్పెన్స్‌, క్రైమ్‌ థ్రిల్లర్‌గా తెరకెక్కిన ఈ సినిమాలో ప్రియా ప్రకాశ్‌ వారియర్‌ కథానాయికగా నటించారు. మెగా సూపర్‌గుడ్‌ ఫిల్మ్స్‌ బ్యానర్‌పై ఎన్‌.వి. ప్రసాద్‌, అంజన్‌ కుమార్‌ ఈ చిత్రాన్ని నిర్మించారు. అన్నిరకాల పోస్ట్‌ప్రొడక్షన్‌ పనులు పూర్తి చేసుకున్న ఈ చిత్రం మరికొన్నిరోజుల్లో ప్రేక్షకుల ముందుకు రానుంది.