Vishal: ‘లాఠీ’తో వస్తున్నాడు

విశాల్‌ హీరోగా ఎ.వినోద్‌ కుమార్‌ దర్శకత్వంలో ఓ పాన్‌ ఇండియా చిత్రం తెరకెక్కుతోంది. రమణ, నంద సంయుక్తంగా నిర్మిస్తున్నారు. సనయన కథా  నాయిక. ఈ సినిమాకి ‘లాఠీ’ అనే టైటిల్‌ ఖరారు చేసినట్లు ఆదివారం ప్రకటించారు. ఈ సందర్భంగా ఓ వీడియో గ్లింప్స్‌ను విడుదల చేశారు. టెర్రస్‌పైన ఉన్న ఓ షర్ట్‌ పోలీస్‌ యూనిఫాంలా మారడం.. దానిపై విశాల్‌ పాత్ర పేరు ఉండటం.. అక్కడే ఉన్న ఓ కర్ర లాఠీగా మారడం వంటి సన్నివేశాలతో ఆ వీడియో ఆసక్తికరంగా సాగింది. దీన్ని బట్టి ఈ సినిమాలో ఆయన ఓ శక్తిమంతమైన పోలీస్‌గా కనిపించనున్నట్లు అర్థమైంది. యాక్షన్‌కు ప్రాధాన్యమున్న చిత్రమిది. ద్వితీయార్ధంలో ఉండే 45నిమిషాల యాక్షన్‌ సీక్వెన్స్‌ సినిమాకి ప్రధాన ఆకర్షణగా నిలవనుంది. ఈ పోరాట ఘట్టాలకు దిలీప్‌ సుబ్బరాయణ్‌ నేతృత్వం వహించారు. మరి విశాల్‌ తన లాఠీతో సమాజంలో ఎలాంటి మార్పులకు నాంది పలికాడో తెలియాలంటే ఇంకొన్నాళ్లు వేచి చూడక తప్పదు. ఈ చిత్రానికి సంగీతం: సామ్‌ సిఎస్‌, ఛాయాగ్రహణం: బాలసుబ్రమణ్యన్‌