Ricky Ponting: కోహ్లి రిటైరయ్యాకే సచిన్‌తో పోలుస్తా: పాంటింగ్‌

దిల్లీ: సచిన్‌ తెందుల్కర్‌ సాంకేతికంగా అత్యుత్తమ బ్యాటర్‌ అని ఆస్ట్రేలియా మాజీ కెప్టెన్‌ రికీ పాంటింగ్‌ అన్నాడు. కోహ్లి రిటైరయ్యాకే అతణ్ని సచిన్‌తో పోలుస్తానని చెప్పాడు. ‘‘నా ప్రత్యర్థుల్లో, నేను కలిసి ఆడిన వారిలో సచినే సాంకేతికంగా అత్యుత్తమ బ్యాటర్‌. మేము బౌలింగ్‌లో ఎలాంటి వ్యూహాలతో బరిలోకి దిగినా.. అతడు మమ్మల్ని సమర్థంగా ఎదుర్కొనేవాడు. నా తరంలో నేను చూసిన వారిలో సాంకేతికంగా అత్యుత్తమ బ్యాటర్‌ సచినే’’ అని పాంటింగ్‌ అన్నాడు.

అయితే ఇప్పుడే సచిన్‌తో కోహ్లిని పోల్చడానికి అతడు తిరస్కరించాడు. ‘‘ఆట మారింది. నిబంధనలు మారాయి. ఇప్పుడు బ్యాటింగ్‌ చేయడం తేలిక. విరాట్‌కు ఇంకా చాలా సమయం ఉంది. అతడు చాలా మంచి బ్యాటర్‌ అనడంలో ఎలాంటి సందేహం లేదు. కోహ్లి రిటైరయ్యే దాకా వేచి చూద్దాం. ఆ తర్వాత సచిన్‌తో పోల్చడం సమంజసమవుతుంది’’ అని పాంటింగ్‌ అన్నాడు.