క్వార్టర్స్‌లో లక్ష్య, కిరణ్‌

సైనా, సాత్విక్‌ జోడీ ఔట్‌

బ్యాంకాక్‌: థాయ్‌లాండ్‌ ఓపెన్‌ బ్యాడ్మింటన్‌ టోర్నమెంట్లో లక్ష్యసేన్‌, కిరణ్‌జార్జ్‌ క్వార్టర్‌ఫైనల్స్‌కు దూసుకెళ్లారు. గురువారం పురుషుల సింగిల్స్‌ ప్రిక్వార్టర్స్‌లో అన్‌సీడెడ్‌ లక్ష్యసేన్‌ 21-17, 21-15తో నాలుగో సీడ్‌ లిషి ఫెంగ్‌ (చైనా)ను ఓడించాడు. మరో ప్రిక్వార్టర్స్‌లో కిరణ్‌ 21-11, 21-19తో వెంగ్‌ హంగ్‌ యంగ్‌ (చైనా)ను వరుస గేముల్లో ఓడించాడు. కిరణ్‌ ర్యాంకు 59 కాగా.. యంగ్‌ 29వ ర్యాంకర్‌ కావడం విశేషం. మహిళల సింగిల్స్‌లో సైనా నెహ్వాల్‌ కథ ముగిసింది. ప్రిక్వార్టర్స్‌లో ఆమె 11-21, 14-21తో మూడో సీడ్‌ బింగ్‌ జియావో (చైనా) చేతిలో ఓడింది. ఇంకో ప్రిక్వార్టర్స్‌లో అస్మిత 18-21, 13-21తో కరోలినా మారిన్‌ (స్పెయిన్‌) చేతిలో ఓటమి చవిచూసింది. పురుషుల డబుల్స్‌లో టాప్‌సీడ్‌ సాత్విక్‌ సాయిరాజ్‌-చిరాగ్‌శెట్టి జోడీకి ఊహించని ఫలితం ఎదురైంది. ప్రిక్వార్టర్స్‌లో ఇండోనేసియా అన్‌సీడెడ్‌ ద్వయం షోయ్‌బుల్‌-బగాస్‌ 24-26, 21-11, 21-17తో భారత జంటను కంగుతినిపించింది. ఈ మ్యాచ్‌లో తొలి గేమ్‌ను పోరాడి గెలిచిన భారత జోడీ రెండో గేమ్‌ను అనవసర తప్పిదాలతో చేజార్చుకుంది. మూడో గేమ్‌లో ఆరంభంలో 1-5తో వెనుకబడిన సాత్విక్‌ జోడీ.. ఆ తర్వాత 12-17తో పుంజుకునేలా కనిపించింది. కానీ పట్టువదలని ఇండోనేసియా జంట భారత్‌ జోడీకి ఓటమిని మిగిల్చింది.