నా రికార్డులను జైస్వాల్‌ బద్దలు కొడతాడు

దిల్లీ: టీమ్‌ఇండియా యువ ఓపెనర్‌, ఐపీఎల్‌లో రాజస్థాన్‌ రాయల్స్‌కు ప్రాతినిధ్యం వహించే యశస్వి జైస్వాల్‌కు గొప్ప భవిష్యత్తు ఉందని వెస్టిండీస్‌ దిగ్గజ బ్యాటర్‌ బ్రయాన్‌ లారా కొనియాడాడు. అతను టెస్టుల్లో అత్యధిక వ్యక్తిగత స్కోరు (400 నాటౌట్‌) సహా తన పేరిట ఉన్న రికార్డులను బద్దలు కొట్టగలడని అభిప్రాయపడ్డాడు. ‘‘నా రికార్డులకు ముప్పు ఉందని, వాటిని జైస్వాల్‌ అందుకోగలడని భావిస్తున్నా. అతడిలో ఆ సామర్థ్యం ఉంది. ఇప్పటికే టెస్టుల్లో రెండు డబుల్‌ సెంచరీలు సాధించాడు. జైస్వాల్‌ ఎంతో అణకువతో కనిపిస్తాడు. కష్టపడడానికి సిద్ధంగా ఉంటాడు. తొలిసారి అతణ్ని కలిసినపుడే ఆత్మీయ బంధం కలిగింది. నా నుంచి చాలా తెలుసుకోవాలని ప్రయత్నించాడు’’ అని లారా చెప్పాడు.