Gautam Gambhir: సెలెక్టర్లు ఆ ముగ్గుర్ని మించి.. ఆలోచించొచ్చు : గంభీర్‌

ఇంటర్నెట్‌ డెస్క్‌ : టీమ్‌ఇండియా(Team India) సీనియర్‌ ఆటగాళ్లు విరాట్‌ కోహ్లీ(Virat Kohli), రోహిత్‌ శర్మ(Rohit Sharma), కేఎల్‌ రాహుల్‌(KL Rahul)ను మించి బీసీసీఐ(BCCI) సెలెక్టర్లు ఇతరుల వైపు చూడాలని అనుకుంటే.. అలాగే చేయాలని మాజీ ఆటగాడు గౌతమ్‌ గంభీర్‌(Gautam Gambhir) సూచించాడు. అయితే దీనిపై స్పష్టత ఉండాలని కోరాడు.

‘ఈ అంశంపై స్పష్టత ఉండాలి. ఈ ఆటగాళ్లకు.. సెలెక్టర్లకు మధ్య మంచి కమ్యూనికేషన్‌ ఉండాలి. ఒకవేళ సెలెక్టర్లు వీళ్లను మించి ఇతరులను తీసుకోవాలని నిర్ణయించుకుంటే.. అలాగే చేయాలి. చాలా దేశాలు ఇలా చేశాయి’ అని గంభీర్‌ ఓ క్రీడా ఛానల్‌తో అన్నాడు. అలాగే సీనియర్లను తొలగించినప్పుడు జరిగే రాద్దాంతంపై కూడా గంభీర్‌ స్పందించాడు. సెలెక్టర్లు, మేనేజ్‌మెంట్‌ ఇలాంటి నిర్ణయాలు తీసుకున్నప్పుడు.. మనం అతిగా స్పందిస్తామని చెప్పాడు.

‘‘చివరగా.. ఆటలో వ్యక్తుల గురించి ఆలోచించకూడదు. జట్టు లక్ష్యాలే ప్రధానం. వచ్చే టీ20 ప్రపంచకప్‌(2024) టోర్నీ కోసం ఎలాంటి ప్రణాళికలతో ముందుకువెళ్తున్నారన్నదే ముఖ్యం. ఎందుకంటే మనం అక్కడికి వెళ్లి గెలవాలి. ఇలాంటి వాళ్లు ఇప్పటి వరకు దాన్ని సాధించకపోతే.. సూర్యకుమార్‌ లాంటి యువ ఆటగాళ్లు ఆ కల నెరవేర్చుతారేమో ఎవరికి తెలుసు’ అని గంభీర్‌ వ్యాఖ్యానించాడు. ఇక ఈ ముగ్గురు సీనియర్లు పొట్టిఫార్మాట్‌లో తిరిగి పుంజుకోవడం ప్రస్తుతానికైతే కష్టమేనని పేర్కొన్నాడు. కేఎల్ రాహుల్‌ ఫామ్‌లో లేకపోవడం.. విరాట్, రోహిత్ వయసును దృష్టిలో ఉంచుకొని గంభీర్ ఇలాంటి వ్యాఖ్యలు చేసినట్లు క్రీడా వర్గాలు అభిప్రాయపడుతున్నాయి. చాలా దేశాలు యువకులతోనే తమ జట్లను తయారు చేసుకొనే కార్యాచరణలో మునిగిపోయాయి.