Rohit Sharma - IPL 2024: ‘ఆ నిర్ణయం రోహిత్‌ శర్మ ఆటపై ప్రభావం చూపదు’

ఇంటర్నెట్ డెస్క్: ఐపీఎల్‌-2024కు రంగం సిద్ధమవుతోంది. మార్చి 22 నుంచే ఈ మెగా టోర్నీ ప్రారంభంకానుంది. అంతర్జాతీయ క్రికెట్‌కు దూరంగా ఉన్న ఆటగాళ్లు ఇప్పటికే ఐపీఎల్ కోసం సాధన మొదలెట్టారు. ఇక, లీగ్‌లో విజయవంతమైన జట్టుగా గుర్తింపు పొందిన ముంబయి ఇండియన్స్‌ భారీ మార్పులతో బరిలోకి దిగుతోంది. ఐదు టైటిళ్లు అందించిన రోహిత్ శర్మ (Rohit Sharma)ను కెప్టెన్సీ నుంచి తొలగించి హార్దిక్‌ పాండ్య (Hardik Pandya)కు సారథ్య బాధ్యతలు అప్పగించారు. కెప్టెన్సీ తొలగింపు ప్రభావం రోహిత్ ఆటతీరుపై ఉంటుందేమోనని అభిమానులు ఆందోళన వ్యక్తం చేస్తున్నారు. ఈ అంశంపై ఆస్ట్రేలియా మాజీ క్రికెటర్, సన్‌రైజర్స్‌ హైదరాబాద్‌ మాజీ కోచ్‌ టామ్‌ మూడీ (Tom Moody) మాట్లాడాడు. కెప్టెన్సీ తొలగింపు రోహిత్ శర్మ బ్యాటింగ్‌పై ప్రభావం చూపదని అభిప్రాయపడ్డాడు. 

‘‘రోహిత్ శర్మ సత్తా ఏంటో ఆటగాడిగా అతను ఎంత ప్రమాదకరమో మనందరికీ తెలుసు. ఐపీఎల్‌లో కెప్టెన్సీ తొలగింపు రోహిత్‌ బ్యాటింగ్‌శైలిపై ప్రభావం చూపుతుందని నేనైతే అనుకోవడం లేదు. అతను స్వేచ్ఛగా తన సహజ శైలిలో ఆడతాడు’’ అని టామ్‌ మూడీ తెలిపాడు. స్టార్‌ ఆటగాళ్లు, ఫ్యాన్‌బేస్‌ ఎక్కువగా ఉన్న ముంబయి ఇండియన్స్‌ను నడిపించడం హార్దిక్ పాండ్యకు సవాలుతో కూడుకున్నదని అభిప్రాయపడ్డాడు. మార్చి 24న అహ్మదాబాద్‌లోని నరేంద్ర మోదీ స్టేడియంలో గుజరాత్ టైటాన్స్‌తో ముంబయి ఇండియన్స్‌ తమ తొలి మ్యాచ్‌ ఆడనుంది.