T20 World Cup: టీ20 క్రికెట్‌లో దక్షిణాఫ్రికా స్పిన్నర్‌ కొత్త రికార్డు

ఇంటర్నెట్‌ డెస్క్‌: టీ20 క్రికెట్‌లో దక్షిణాఫ్రికా స్పిన్నర్‌ తబ్రెయిజ్‌ షంసీ అరుదైన ఘనతను అందుకున్నాడు. ఒక క్యాలెండర్ ఇయర్‌లో అత్యధిక వికెట్లు (32) పడగొట్టిన ఆటగాడిగా నిలిచి సరికొత్త రికార్డును నెలకొల్పాడు. టీ20 ప్రపంచకప్‌లో భాగంగా శ్రీలంకతో జరిగిన మ్యాచ్‌లో 3 వికెట్లు సాధించి ఈ రికార్డును అందుకున్నాడు. ఇక, ఐసీసీ టి20 బౌలర్ల ర్యాంకింగ్స్‌లో షంసీ ప్రస్తుతం నెంబర్‌వన్‌ బౌలర్‌గా కొనసాగుతున్నాడు. ఆస్ట్రేలియా బౌలర్‌ ఆండ్రూ టై 2018 క్యాలండర్‌ ఇయర్‌లో 31 వికెట్లు సాధించాడు. ఈ రికార్డును షంసీ బద్దలు కొట్టాడు. షంసీ 2017లో టీ20ల్లో అరంగేట్రం చేశాడు. ఓవరాల్‌గా దక్షిణాఫ్రికా తరపున 45 టీ20ల్లో 53 వికెట్లు పడగొట్టాడు. ఈ ఏడాది ప్రారంభంలో పాకిస్థాన్‌తో జరిగిన మ్యాచ్‌లో 4/25 అత్యుత్తమ ప్రదర్శన చేశాడు.

ఇక, ఈ టీ20 ప్రపంచకప్‌లో దక్షిణాఫ్రికా రెండో విజయాన్ని నమోదు చేసింది. శనివారం శ్రీలంకతో జరిగిన మ్యాచ్‌లో 4 వికెట్ల తేడాతో నెగ్గింది. లంక నిర్దేశించిన 143 పరుగుల లక్ష్యాన్ని సౌతాఫ్రికా 19.5 ఓవర్లలో ఛేదించింది. సౌతాఫ్రికా బ్యాటర్లలో కెప్టెన్‌ బావుమా (46) రాణించగా.. మార్‌క్రమ్‌ (19) ఫర్వాలేదనిపించాడు. చివర్లో విజయానికి కావాల్సిన పరుగులు ఎక్కువ ఉండడంతో కాస్త ఉత్కంఠ నెలకొంది. అయితే, డేవిడ్‌ మిల్లర్ (23; 13 బంతుల్లో 2 సిక్స్‌లు), రబాడ (13; 7 బంతుల్లో 1 ఫోర్‌, ఒక సిక్స్‌) వేగంగా ఆడి జట్టుకు విజయాన్ని అందించారు.