Pujara: నేను ఓ పది నిమిషాలు క్రీజ్‌లో ఉంటే చాలు..: పుజారా

ఇంటర్నెట్ డెస్క్‌: బోర్డర్ - గావస్కర్ ట్రోఫీలో (Border - Gavaskar Trophy) భారత్ అదరగొట్టేస్తోంది. నాలుగు టెస్టుల సిరీస్‌లో ఆసీస్‌పై టీమ్‌ఇండియా రెండో టెస్టులోనూ విజయం సాధించింది. కేవలం మూడున్నర రోజుల్లోనే ముగిసిన టెస్టులో భారత్‌ అనూహ్యంగా పుంజుకొని మరీ విజయం సాధించడం గమనార్హం. టీమ్‌ఇండియా స్టార్‌ బ్యాటర్ ఛెతేశ్వర్ పుజారాకిది (Pujara) వందో టెస్టు.. అదీనూ విన్నింగ్‌ షాట్ కొట్టే ఛాన్స్‌ కూడా పుజారాకే దక్కడం విశేషం. మ్యాచ్‌ అనంతరం పుజారా ప్రత్యేకంగా మాట్లాడాడు. అంతకుముందు పుజారాకు ఆసీస్‌ కెప్టెన్ ప్యాట్ కమిన్స్‌ తమ ఆటగాళ్ల సంతకాలతో కూడిన జెర్సీని బహూకరించాడు. 

‘‘ఇదొక అద్భుతమైన టెస్టు మ్యాచ్‌. అయితే, తొలి ఇన్నింగ్స్‌లో దురదృష్టవశాత్తూ పరుగులేమీ చేయలేకపోయా. ఓ పది నిమిషాలు క్రీజ్‌లో ఉంటే చాలు నేను రన్స్‌ చేస్తానని నాకు తెలుసు. వందో టెస్టులో విజయం సాధించిన అనుభూతి ప్రత్యేకంగా ఉంటుంది. మరీ ముఖ్యంగా కుటుంబ సభ్యులు, స్నేహితులు, అభిమానుల సమక్షంలో విన్నింగ్‌ షాట్‌ కొట్టడం ఆనందంగా ఉంది. మిగతా రెండు టెస్టుల్లోనూ ఉత్తమ ప్రదర్శన ఇవ్వడానికి ప్రయత్నిస్తాం. ఈ మ్యాచ్‌లో మేం 200 నుంచి 250 పరుగుల వరకు ఛేదించాల్సి ఉంటుందని భావించాం. దాని కోసం సన్నద్ధమయ్యాం. రెండో రోజో చివరి సెషన్‌లో మేం కొంచెం ఎక్కువగా పరుగులు ఇచ్చాం. అయితే ఇవాళ మాత్రం మా బౌలర్లు అదరగొట్టారు. స్వీప్‌ షాట్లను కొట్టాలని ముందే అనుకోలేదు. కానీ, తక్కువ బౌన్స్‌ కావడంతో ఇదే బెటర్‌ అని భావించా. దీని కోసం చాలా సాధన చేశా. ఇలాంటి పిచ్‌ మీద చాలా జాగ్రత్తగా ఆడాల్సి ఉంది.  కొన్ని బంతులు తిరుగుతుంటాయి. మరికొన్ని వికెట్‌కు నేరుగా వస్తుంటాయి. అందుకే ఆత్మవిశ్వాసంతో షాట్లు ఆడాలి. రంజీ ట్రోఫీని గెలిచిన సౌరాష్ట్ర జట్టు సభ్యులకు అభినందనలు. ’’ అని పుజారా తెలిపాడు.