ఏడాదిలో రూ.6 లక్షలతో ఇడ్లీల కొనుగోలు

స్విగ్గీలో 8,428 ప్లేట్లు ఆర్డర్‌ చేసిన హైదరాబాద్‌ వాసి

ఈనాడు, హైదరాబాద్‌: నగరానికి చెందిన ఓ వ్యక్తి ఏడాదిలో ఇడ్లీల కోసం ఏకంగా రూ.6 లక్షలు ఖర్చు చేశారు. ప్రముఖ ఫుడ్‌ డెలివరీ యాప్‌ స్విగ్గీలో ఆయన ఒక్కరే 8,428 ప్లేట్ల ఇడ్లీలను ఆర్డర్‌ చేశారు. గురువారం (మార్చి 30) ‘ప్రపంచ ఇడ్లీ దినోత్సవాన్ని’ పురస్కరించుకుని స్విగ్గీ ఈ అల్పాహార వంటకంపై తన వార్షిక నివేదికను విడుదల చేసింది. దీని ప్రకారం.. గత మార్చి 30 నుంచి ఈ ఏడాది మార్చి 25 వరకు ఈ సంస్థ దేశవ్యాప్తంగా 3.3 కోట్ల ప్లేట్ల ఇడ్లీలను డెలివరీ చేసింది. ఇడ్లీలను ఆరగించడంలో బెంగళూరు వాసులు ముందున్నారని, ఆ తరువాత హైదరాబాద్‌, చెన్నై, ముంబయి, కోయంబత్తూరు నగరాల్లో ఎక్కువ ఆర్డర్లు వచ్చాయని స్విగ్గీ తెలిపింది. హైదరాబాద్‌ వాసులు కారంపొడి నెయ్యి ఇడ్లీ ఎక్కువగా తింటున్నారని పేర్కొంది.