పానీపూరీ ప్రియుల డ్రీమ్‌ మెషీన్‌

ఇంటర్నెట్‌ డెస్క్‌: ఒకప్పుడు సాయంత్రమైతే చాలు పానీపూరి బండి కనిపిస్తే ఆగిపోయేవాళ్లం. ఓ ప్లేటు పూరీ లోపలేస్తే గానీ మనసు సహించేది కాదు. అలాంటిది కరోనా పుణ్యమా అని పరిస్థితి పూర్తిగా మారిపోయింది. పానీపూరిని ఎంతగానో ఇష్టపడే వారు సైతం అటుగా వెళ్లడమే మానేశారు. అలాంటి వారి కోసమే ఈ  ఆటోమేటిక్‌  మెషీన్‌. ఓ ఐఏఎస్‌ అధికారి దీన్ని సోషల్‌ మీడియాలో షేర్‌ చేయడంతో ఈ వీడియో వైరల్‌గా మారింది. 

ఈ మెషీన్‌ను ముట్టుకోకుండానే సెన్సర్‌ల ద్వారా పనిచేస్తుంది. పూరి తీసుకుని మనకు ఇష్టమైన ఫ్లేవర్‌ ఉన్న నాజిల్‌ దగ్గర పెడితే దానిలోకి పానీ పడటం ఈ యంత్రం ప్రత్యేకత. ఖట్టా-మీఠా, గార్లిక్‌-జల్‌జీరా, ధనియా-పుదీనా ఫ్లేవర్లలో ఏది కావలిస్తే దానిని తీసుకునేందుకు వీలుగా ఈ యంత్రాన్ని రూపొందించారు. కరోనా కాలంలో ఇదే ‘ద బెస్ట్‌ మెషీన్‌’ అంటున్నారు నెటిజన్లు. ఛత్తీస్‌గఢ్‌ రాజధాని రాయ్‌పూర్‌ నగరంలోని తేలిబంధా ఏరియాలో ఉందట ఈ పానీపూరీ ప్రియుల డ్రీమ్‌ మెషీన్‌. మనమక్కడకు వెళ్లలేం గానీ వీడియో చూసి ఆనందించండి..