Senegal: ఘోరం.. రోడ్డు ప్రమాదంలో 40మంది దుర్మరణం!

దాకర్‌: ఆఫ్రికా ఖండంలోని సెనెగల్‌లో ఘోర రోడ్డు ప్రమాదం(Road accident) సంభవించింది. ప్రమాదవశాత్తు రెండు బస్సులు ఢీకొట్టడంతో 40మంది దుర్మరణం చెందారు. 70మందికి పైగా గాయపడ్డారు. ఈ విషాదద ఘటన ఆదివారం తెల్లవారు జామున 3.30గంటల సమయంలో చోటుచేసుకున్నట్టు సెనెగల్‌ అధ్యక్షుడు మాకే సాల్‌ వెల్లడించారు. ఈ మేరకు ఆయన ట్వీట్‌ చేశారు. గ్నిబీలో జరిగిన ఈ ఘోర ప్రమాదంలో 40మంది మరణించగా.. అనేకమంది తీవ్ర గాయాలపాలయ్యారని ఆయన పేర్కొన్నారు. బాధిత కుటుంబాలకు తన ప్రగాఢ సానుభూతి తెలుపుతూ.. క్షతగాత్రులు త్వరగా కోలుకోవాలని ప్రార్థిస్తూ ట్వీట్‌ చేశారు. వారి మృతి పట్ల సోమవారం నుంచి మూడు రోజుల పాటు సంతాపదినాలుగా ప్రకటించారు. రోడ్డు భద్రతా చర్యలపై చర్చించేందుకు అంతర్‌ మంత్రిత్వ మండలిని నిర్వహిస్తామని అధ్యక్షుడు తెలిపారు.

ఈ ఘటనపై పబ్లిక్‌ ప్రాసిక్యూటర్‌ చీక్‌ డియోంగ్‌ మాట్లాడుతూ.. ప్రభుత్వ బస్సు టైరు పంక్చర్‌ అయి రోడ్డుపై అడ్డం తిరగ్గా.. ఎదురుగా వస్తున్న మరో బస్సు ఢీకొట్టడంతో ఈ విషాదం చోటుచేసుకుందన్నారు. ఈ ఘటనలో 78మందికి గాయాలయ్యాయని.. వారిలో కొందరి ఆరోగ్య పరిస్థితి విషమంగా ఉన్నట్టు తెలిపారు. ఈ ఘటనలో రెండు బస్సుల ముందు భాగాలూ తీవ్రంగా దెబ్బతిన్నాయి. ఈ ప్రమాదానికి సంబంధించిన ఫొటోలు సామాజిక మాధ్యమాల్లో వైరల్‌గా మారాయి. అధ్వాన్నమైన రోడ్లకు తోడు కార్లు కండిషన్‌ బాగా లేకపోవడం, డ్రైవర్లు రహదారి నియమాలు పాటించకపోవడంతో సెనెగల్‌లో తరచూ రహదారి ప్రమాదాలు జరుగుతుంటాయని స్థానికులు పేర్కొంటున్నారు. 2017లోనూ ఇలాంటి తరహా ఘటనే ఒకటి చోటుచేసుకుంది. రెండు బస్సులు పరస్పరం ఢీకొట్టుకోవడంతో అప్పట్లో 25మంది దుర్మరణం చెందారు.