China: తైవాన్‌పై అవసరమైతే బలప్రయోగం తప్పదు..!

వేర్పాటువాదాన్ని అస్సలు సహించమన్న చైనా

ఇంటర్నెట్‌డెస్క్‌: తైవాన్‌లో వేర్పాటు వాదాన్ని అస్సలు సహించమని బుధవారం చైనా పునరుద్ఘాటించింది. అవసరమైతే ఈ ద్వీపాన్ని స్వాధీనం చేసుకోవడానికి బలప్రయోగం చేయడానికి కూడా వెనుకాడబోమని స్పష్టం చేసింది. నాన్సీ పెలోసీ పర్యటన అనంతరం తైవాన్‌ చుట్టుపక్కల భారీ ఎత్తున చైనా యుద్ధ విన్యాసాలు ప్రారంభించిన తర్వాత ఈ ప్రకటన వెలువడింది. చైనాకు చెందిన తైవాన్‌ అఫైర్స్‌ ఆఫీస్‌ ఈ మేరకు శ్వేతపత్రాన్ని విడుదల చేసింది. ఆర్థిక తాయిలాలు, సైనిక బలం సాయంతో తైవాన్‌ను ఏ విధంగా వశం చేసుకుంటామో.. దీనిలో స్పష్టంగా పేర్కొన్నారు. 

‘‘ప్రశాంతంగా విలీనం కావడానికి అవసరమైన అవకాశాలను కల్పిస్తాం. అదే సమయంలో ఏ విధమైన వేర్పాటు వాదానికి చోటు లేదు. బలప్రయోగ అవకాశాలనూ తోసిపుచ్చడంలేదు. విలీనానికి అవసరమైన ఏ చర్య తీసుకోవడానికైనా అప్షన్‌ను సిద్ధంగా పెట్టుకొన్నాం. వేర్పాటువాదులు, బాహ్య శక్తులు లక్ష్మణ రేఖను దాటడమే.. మేము కఠిన చర్యలు తీసుకొనేలా పురిగొల్పుతాయి’’ అని ఈ శ్వేత పత్రంలో పేర్కొన్నారు. చైనా చివరిసారిగా 2000 సంవత్సరంలో శ్వేత పత్రాన్ని విడుదల చేసింది. దాదాపు 22 ఏళ్ల తర్వాత భారీ సైనిక విన్యాసాల మధ్య మరోసారి ఈ పత్రాన్ని విడుదల చేయడం గమనార్హం.

1990 తర్వాత తైవాన్‌లో నియంతృత్వం పోయి.. ప్రజాస్వామ్యం వచ్చింది. ఆ తర్వాత ప్రపంచ స్థాయిలో గుర్తింపు వచ్చింది. 2016లో త్సాయి యింగ్‌ వెన్‌ అధికారంలోకి వచ్చాక చైనాతో సంబంధాలు తీవ్రంగా దెబ్బతిన్నాయి. త్సాయి నేతృత్వంలోని డెమోక్రటిక్‌ ప్రోగ్రెసీవ్‌ పార్టీ తైవాన్‌ను చైనాలో భాగంగా పరిగణించదు.