Nord Stream: నార్డ్‌ స్ట్రీమ్‌ లీకేజీలకు ప్రధాన కారణం అవే..: డానిష్‌ పోలీసులు

కోపెన్‌హగెన్‌: బాల్టిక్‌ సముద్రం(Baltic Sea)లో నార్డ్‌స్ట్రీమ్‌(Nord stream) గ్యాస్‌ పైపులైన్లలో లీకేజీలకు కారణం శక్తివంతమైన పేలుళ్లేనని డెన్మార్క్‌ పోలీసులు వెల్లడించారు. అనేకసార్లు ప్రాథమిక దర్యాప్తు జరిపాకే తాము ఈ విషయాన్ని ధ్రువీకరిస్తున్నట్టు ఓ ప్రకటనలో స్పష్టంచేశారు. డెన్మార్క్‌ ప్రత్యేక ఆర్థిక జోన్‌లోని నార్డ్‌ స్ట్రీమ్‌ 1, 2 పైపులైన్లలో సెప్టెంబర్‌ 26న చోటుచేసుకున్న లీకేజీలపై తదుపరి దర్యాప్తును కోపెన్‌హగన్‌ పోలీసులు, డెన్మార్క్‌ సెక్యూరిటీ, ఇంటెలిజెన్స్‌ సర్వీసెస్‌ సంయుక్తంగా నిర్వహిస్తాయని తెలిపారు. అయితే, ఆ దర్యాప్తు ఎప్పటికి పూర్తవుతుందనేది మాత్రం తాము ఇప్పుడే చెప్పలేమన్నారు.  అలాగే, స్వీడన్‌లో ధ్వంసమైన పైపులైన్‌ల వీడియోగా పేర్కొంటూ స్వీడిష్ వార్తాపత్రిక ఎక్స్‌ప్రెసెన్ మంగళవారం ప్రచురించిన ఓ కథనంలో కనీసం 50 మీటర్లు (165 అడుగులు) మెటల్‌ పైపు అదృశ్యమైనట్టుగా కనబడుతోందని పేర్కొంది.

అంతర్జాతీయ నీటి మార్గంలో ఉన్న ఈ పైపులైన్లలో ఏర్పడిన నాలుగు లీకేజీలూ డెన్మార్క్‌, స్వీడన్‌ ప్రత్యేక ఆర్థిక జోన్‌లోనే సంభవించాయి. ఉక్రెయిన్‌- రష్యా యుద్ధం నేపథ్యంలో బాల్టిక్‌ సముద్ర మార్గంలో రష్యా నుంచి జర్మనీకి సహజవాయువును తరలించే నార్డ్‌ స్ట్రీమ్‌ (Nord Stream) పైపులైన్లలో వరుస లీకేజీలు ఇటీవల కాలంలో తీవ్ర కలవరానికి గురిచేసిన విషయం తెలిసిందే. ధ్వంసమైన ఈ పైపులైన్ల నుంచి భారీగా మిథేన్ వాయువుతో పాటు శక్తివంతమైన కార్బన్‌డై ఆక్సైడ్‌ చాలా రోజులుగా గాలిలోకి విడుదలైంది. భారీ పేలుడు వల్లే ఈ లీకేజీలు సంభవించాయని శాస్త్రవేత్తలు గతంలో అంచనా వేయగా.. డానిష్‌ పోలీసుల దర్యాప్తులో అదే నిజమని తేలింది. మరోవైపు, ఈ పేలుళ్ల వెనుక అమెరికా హస్తం ఉందని పుతిన్‌ ఇప్పటికే పలుమార్లు ఆరోపించగా.. అగ్రరాజ్యం తోసిపుచ్చింది.