Malayalam Tweet: యూఏఈ ప్రధాని మలయాళంలో ట్వీట్‌.. నెట్టింట వైరల్‌

ఇంటర్నెట్‌ డెస్క్‌: కేరళ, యూఏఈల మధ్య అనుబంధాన్ని చాటుతూ.. దుబాయ్‌ పాలకుడు, యూఏఈ ప్రధాని షేక్‌ మొహమ్మద్‌ బిన్‌ రషీద్‌ అల్‌ మక్తుం తాజాగా మలయాళంలో చేసిన ఓ ట్వీట్ నెట్టింట వైరల్‌గా మారింది. వివరాల్లోకి వెళ్తే.. దుబాయ్‌ పర్యటనలో ఉన్న కేరళ ముఖ్యమంత్రి పినరయి విజయన్‌ బుధవారం ‘దుబాయ్ ఎక్స్‌పో- 2020’ వేదికగా మక్తుంతో సమావేశమయ్యారు. ఈ కార్యక్రమం అనంతరం మక్తుం.. ‘యూఏఈకి కేరళతో ప్రత్యేక అనుబంధం ఉంది. దుబాయ్‌, యూఏఈ ఆర్థికాభివృద్ధిలో కేరళీయులు కీలక పాత్ర పోషిస్తున్నారు’ అని మలయాళంలో ట్వీట్‌ చేశారు. విజయన్‌తో భేటీ సందర్భంగా దిగిన ఫొటోనూ ఈ సందర్భంగా పంచుకున్నారు. ఈ ట్వీట్‌ కాస్త సోషల్ మీడియాలో వైరల్‌గా మారింది. పలువురు ప్రవాస మలయాళీలు దీన్ని షేర్‌ చేస్తున్నారు.

ఈ ట్వీట్‌కు విజయన్ సైతం అరబిక్‌లో స్పందించడం విశేషం. ‘మీ సాదర స్వాగతానికి, ఆతిథ్యానికి ధన్యవాదాలు’ అని అరబిక్‌లో ట్వీట్‌ చేశారు. యూఏఈ, దుబాయ్‌లతో దక్షిణ భారతదేశం తన అనుబంధాన్ని మరింత బలోపేతం చేసుకోవాలని భావిస్తోందన్నారు. మరోవైపు సమావేశంలో భాగంగా కేరళ అభివృద్ధికి తోడ్పాటునందించడంపై దుబాయ్‌ పాలకుడికి విజయన్‌ కృతజ్ఞతలు తెలిపినట్లు.. సీఎం కార్యాలయం వెల్లడించింది. ఈ సందర్భంగా మరిన్ని పెట్టుబడులకు ఆహ్వానించినట్లు పేర్కొంది.