పాకిస్థాన్‌లో ఒకేరోజు రెండు ఘోర ప్రమాదాలు

బస్సు లోయలో పడి 42 మంది మృతి
పడవ బోల్తా పడి 17 మంది దుర్మరణం

ఇస్లామాబాద్‌: పాకిస్థాన్‌లో ఆదివారం రెండు ఘోర ప్రమాదాలు జరిగాయి. మొత్తం 59 మంది మరణించారు. పలువురి పరిస్థితి విషమంగా ఉంది. బలూచిస్థాన్‌ ప్రావిన్స్‌లోని లస్బెలా ప్రాంతంలో 48మంది ప్రయాణికులతో వెళ్తున్న ఓ బస్సు యూటర్న్‌ తీసుకుంటున్న క్రమంలో వంతెన స్తంభాన్ని ఢీ కొట్టింది. అనంతరం లోయలో పడ్డ బస్సుకు మంటలు వ్యాపించాయి. 42మంది అక్కడికక్కడే దుర్మరణం చెందగా.. మరికొంతమంది పరిస్థితి విషమంగా ఉంది. చిన్నారి, మహిళతో పాటు మరొకరు ప్రాణాలతో బయటపడ్డారు. మరణించిన వారిని గుర్తించడానికి డీఎన్‌ఏ పరీక్షలు నిర్వహిస్తున్నట్లు అధికారులు తెలిపారు.

పడవ మునకలో..

మరో ఘటనలో కొహాట్‌ జిల్లాలోని టండా డ్యాంలో విహారయాత్ర పడవ బోల్తాకొట్టి చెరువులో మునిగింది. ఈ ప్రమాదంలో 17మంది విద్యార్థులు మృతిచెందారు. 13మందికి గాయాలు అయ్యాయి. ‘‘పడవలో 30మంది ప్రయాణిస్తున్నారు. 17మంది మృతదేహాలను బయటకుతీశాం. గాయపడిన వారిని ఆసుపత్రికి తరలించాం. విద్యార్థులందరూ 7 నుంచి 14 ఏళ్లలోపు వయసువారే’’ అని డిప్యూటీ కమిషనర్‌ ఫుర్కాన్‌ అష్రఫ్‌ తెలిపారు.