Ukraine Crisis: ‘అణు దాడి’కి రష్యా సన్నాహాలు..!

మాస్కో: ఉక్రెయిన్‌ (Ukraine)పై దండయాత్ర సాగిస్తోన్న రష్యా (Russia) తమ దాడులను మరింతగా పెంచేందుకు సిద్ధమవుతోంది. ఆ దేశంలో అణ్వాయుధాల (nuclear weapons)ను  ప్రయోగించేందుకు సన్నాహాలు చేస్తోంది. ఈ మేరకు తాము అణ్వస్త్ర సామర్థ్యం గల క్షిపణి దాడులపై సాధన చేస్తోన్నట్లు స్వయంగా క్రెమ్లిన్‌ ప్రకటించడం గమనార్హం.

రష్యాలోని కలినిన్‌గ్రాడ్‌ నగరంలో తమ దళాలు అణు సామర్థ్యం గల క్షిపణి దాడులను ప్రాక్టీస్‌ చేస్తున్నట్లు రష్యా బుధవారం ప్రకటించింది. బాల్టిక్‌ సముద్రంపై ఉన్న ఎంక్లేవ్‌లో ఇస్కాండెర్‌ మొబైల్‌ బాలిస్టిక్‌ మిసైల్‌ వ్యవస్థకు చెందిన ఎలక్ట్రానిక్‌ ప్రయోగ వ్యవస్థతో మాక్‌ డ్రిల్‌ చేపట్టినట్లు రష్యా రక్షణశాఖ ఓ ప్రకటనలో వెల్లడించింది. ఇందులో భాగంగా శత్రువుల వైమానిక స్థావరాలు, మౌలిక సదుపాయాలు, సైనిక పరికరాలు, కమాండ్‌ పోస్ట్‌లపై ఒకటి అంతకంటే ఎక్కువ సార్లు క్షిపణులు ప్రయోగించేలా సాధన చేసినట్లు తెలిపింది. ఎలక్ట్రానిక్‌ ప్రయోగాల తర్వాత జరిగే ప్రతిదాడి నుంచి సైనిక సిబ్బంది తప్పించుకునే విన్యాసాలను కూడా చేపట్టినట్లు పేర్కొంది. దాడుల అనంతరం వెలువడే రేడియేషన్‌, రసాయన పరిస్థితుల్లో చేపట్టాల్సిన చర్యలపైనా సాధన చేసినట్లు తెలిపింది. ఈ డ్రిల్‌లో 100 మందికి పైగా రష్యా వ్యూహాత్మక దళాలు పాల్గొన్నట్లు వెల్లడించింది.

‘సైనిక చర్య’ పేరుతో ఉక్రెయిన్‌పై రష్యా సాగిస్తోన్న సైనిక చర్యకు 70రోజులు దాటింది. ఫిబ్రవరి 24న ఉక్రెయిన్‌ మీదకు తమ సేనలను పంపిన నాటి నుంచే రష్యా అణు దాడులపై దృష్టిపెట్టింది. ఉక్రెయిన్‌పై యుద్ధంలో పశ్చిమ దేశాలు నేరుగా జోక్యం చేసుకుంటే ప్రతిదాడి తీవ్రంగా ఉంటుందని క్రెమ్లిన్‌ అనేక సార్లు హెచ్చరించింది. అటు పుతిన్‌ కూడా వ్యూహాత్మక అణ్వాయుధలను సిద్ధం చేసుకుంటున్నట్లు గతంలో పలుమార్లు హెచ్చరికలు చేశారు. ఇప్పుడు ఆ దాడులకు సన్నాహాలు చేస్తుండటంతో ఈ పరిణామాలు మూడో ప్రపంచ యుద్ధానికి దారితీస్తాయన్న అనుమానాలు వ్యక్తమవుతున్నాయి.