బ్రహ్మ పలికిన తొలి శబ్దం

సర్వవేదా యత్పదమామనంతి తపాంసి
సర్వాణి చ యద్వదంతి యదిచ్చంతో
బ్రహ్మచర్యం చరంతి తత్తే పదం
సంగ్రహేణ బ్రవీమ్యోమిత్యేతత్‌

కఠోపనిషత్తులో యమధర్మరాజు నచికేతుడికి చెప్పిన శ్లోకమిది. వేదాలన్నీ ఏ పదాన్ని కీర్తిస్తాయో, సాధనలన్నీ ఏ పదాన్ని తెలియజేస్తాయో, ఏ ఆశతో బ్రహ్మచర్యం పాటిస్తారో ఆ పదమే ‘ఓం’ అని భావం. పరమశివుడు బ్రహ్మతత్వం గురించి అడిగి నప్పుడు సనత్కుమారుడు ‘ఒక్క ఓంకారం తోనే బ్రహ్మతత్వాన్ని వివరించవచ్చు. ఎలాంటి మాలిన్యమూ లేనిది, ద్వంద్వాలకు అతీతమైంది, సర్వానికీ శుభం కలిగించేది, అందరి దాహాలనూ తీర్చేది ఓంకారమే’ అని వివరించినట్టు భారతం చెబుతోంది.
ప్రణవం అని పిలుచుకునే ఓంకారం పరబ్రహ్మాన్ని తెలియజేసే శబ్దం. అకార, ఉకార, మకారాల కలయికే ఓంకారం. ఇది బీజాక్షరాల్లో ప్రధానమెంది. బ్రహ్మ ముఖం నుంచి వెలువడిన తొలి శబ్దం. వేదమంత్రాలు కూడా ఓంకార శబ్దంతోనే మొదలౌతాయి. ‘ఓంకారం త్రిమూర్తులకు ప్రతీక. ఓంకార ఉపాసనతో సర్వ ఆశలూ, ఆశయాలూ నెరవేరతాయి. లయాన్ని కలిగిస్తుంది. జగత్తు యథార్థ స్థితి తెలుస్తుంది. ఓంకారోపాసన చేసేవారు నమస్కరించదగిన వారవుతారు’ ఇదీ ధర్మశాస్త్ర సారాంశం. శాంతం, శివం, అద్వైతాల కలయిక అయిన ఓంకారాన్ని స్మరించేవారికి పరమాత్మ తత్వమేమిటో బోధపడుతుంది.

శరత్‌ చంద్రిక