దైవదూత సమాధానం

ఒకసారి ఓ వ్యక్తి ప్రవక్త (స) సమక్షంలోనే మహనీయ అబూబకర్‌ (ర)ను అడ్డూ అదుపూ లేకుండా తిట్లతో దూషిస్తున్నాడు. అతని తిట్లను మౌనంగా వింటూ, చిరునవ్వు చిందిస్తున్నారు మహనీయులు. చివరికి హజ్రత్‌ అబూబకర్‌ సహనం సన్నగిల్లింది. బదులుగా ఆయన కూడా ఓ కఠినమైన మాటన్నారు. ఆయన నోటి నుంచి ఆ మాట వెలువడగానే ప్రవక్త (స) ముఖంలో అయిష్టత కనిపించింది, అక్కడి నుంచి లేచి వెళ్లిపోయారు. హజ్రత్‌ అబూబకర్‌ ఆయన్ను అనుసరించారు. ‘ఇదేమిటి, అతను నన్ను దూషిస్తుంటే.. మీరు మౌనం వహించి చిరునవ్వుతో కనిపించారు. కానీ నేను బదులివ్వగానే అసంతృప్తి కనబరిచారు’ అనడంతో.. ప్రవక్త (స) ‘నువ్వు మౌనంగా ఉన్నంతసేపూ ఒక దైవదూత నీతోపాటు ఉండి, నీ తరఫున అతడికి సమాధానం ఇస్తున్నాడు. కానీ నువ్వు జవాబివ్వడం మొదలెట్టగానే దైవదూత స్థానంలో సైతాన్‌ వచ్చేశాడు. నేను సైతాన్‌తో పాటు కూర్చోలేనుగా’ అన్నారు.

ఖైరున్నీసాబేగం