తపస్సు మనకూ సాధ్యమే

తపస్సు అంటే తల కిందికి, కాళ్లు పైకి చాపి ఎండలో మాడుతూ, వర్షంలో తడుస్తూ, నిద్రాహారాలు మాని.. రోజుల తరబడి దైవాన్ని ధ్యానిస్తూ గడపటం అనుకుంటారు మనలో చాలామంది. సామాన్యులమైన మనకు ఇది సాధ్యం కాదని, మహర్షులు మాత్రమే అడవుల్లో, కొండ గుహల్లో తపస్సు చేస్తారని, దాని వల్ల పాపాలు నశిస్తాయని- భావిస్తారు. ‘తపసా కిల్బిషం హంతి’ అన్నారు. అంటే తపస్సు పాపాలను పోగొడుతుందని కదా అర్థం. మహర్షులే తపస్సు చేస్తారని మన మనసులో ఏర్పడిన ముద్రలను పోగొట్టడానికి భగవద్గీతలో ‘శారీరక, వాచిక, మానసిక- అంటూ మూడు రకాల తపస్సులున్నాయ’ని శ్రీకృష్ణ పరమాత్ముడు చెప్పాడు.

దేవతలు, గురువులు, మహనీయులను పూజించడం, అహింస, సత్ప్రవర్తన మొదలైనవి శారీరక తపస్సు. ఎదుటివారికి నచ్చే విధంగా మాట్లాడటం, ఎల్లప్పుడూ సత్యాన్ని పలకడం, నిరంతర అధ్యయనం వంటివి వాచిక తపస్సు. మనో శుద్ధి, మౌనం, ఆత్మనిగ్రహం మొదలైనవి మానసిక తపస్సు. కనుక వీటిని ఆచరించగలిగితే సామాన్యులమైన మనం తపస్సు చేసినట్లే అవుతుంది. గొప్ప శాంతి నెలకొంటుంది. అలాంటి తపో దీక్షాపరుల సమక్షంలో ఇతరులకు కూడా ప్రశాంతత చేకూరుతుంది.

శివలెంక ప్రసాదరావు