రాజుగారి నిజాయితీ

సుల్తాన్‌ నాసరుద్దీన్‌ ప్రజల ఆదరణ పొందిన రాజు. ధనాగారంనుంచి రూపాయి కూడా సొంత ఖర్చులకు వాడుకోలేదాయన. టోపీలు కుట్టి అమ్మగా వచ్చిన డబ్బుతో కుటుంబాన్ని పోషించేవాడు. ఆయన భార్య కూడా దర్జా దర్పం లేకుండా నిరాడంబరంగా ఉండేది. ఒకరోజు మహారాణి వంట చేస్తుండగా చెయ్యి కాలింది. బాధ తట్టుకోలేక భర్త దగ్గరకు వచ్చి ‘మహారాజా! వంట చేయడం కష్టంగా ఉంది. సాయం చేసేందుకు ఒక సేవకురాలిని నియమించండి’ అనడిగింది. అందుకు రాజు ‘ప్రజల సొమ్మును ప్రజలకే వినియోగించాలనే నియమం పెట్టుకున్నాను కదా! కనుక ప్రభుత్వ ఖజానా నుంచి చిల్లిగవ్వ కూడా సొంతానికి వాడుకోలేం. మరి వచ్చే కొద్దిపాటి ఆదాయంలో సేవకురాలిని పెట్టగలనా? ఇదంతా నీకు తెలిసిందే కదా!’ అనడంతో మహారాణి మౌనంగా వెళ్లిపోయింది. ఇది ఉలమాలు చెప్పిన కథ.

 - తహూరా సిద్దీఖా